Photos: ‘वयात अंतर अन् नाटकाचा प्रयोग…’; ‘महाराष्ट्र भूषण’ अशोक सराफ व निवेदिता यांची रंजक लव्हस्टोरी

मराठी रंगभूमीवरून अभिनयाची सुरुवात करत मराठी-हिंदी चित्रपट, मालिका निर्मिती अशा विविध क्षेत्रांत आपली ओळख निर्माण केलेले प्रसिद्ध अभिनेते अशोक सराफ यांना यंदाचा 'महाराष्ट्र भूषण' पुरस्कार जाहीर झाला आहे. मुख्यमंत्री एकनाथ शिंदे यांनी मंगळवारी (३० जानेवारी) ही घोषणा केली. गेल्या पन्नास वर्षांत कलाकार म्हणून जे काही काम केले ते या पुरस्काराने अधोरेखित झाल्याची भावना अशोक सराफ यांनी ‘लोकसत्ता’शी बोलताना व्यक्त केली. अशोक सराफ आणि निवेदिता सराफ यांची जोडी ही नेहमीच चर्चेत असते. या दोघांची लव्हस्टोरी आणि लग्नाचा किस्सा त्याकाळात खूप गाजला होता. अशोक सराफ आणि निवेदिता यांच्या वयामध्ये तब्बल १८ वर्षांचे अंतर आहे. मात्र त्यांच्या प्रेमात वयाचा अडसर कधीच आला नाही. अशोक आणि निवेदिता यांची पहिली भेट एका नाटकाच्या प्रयोगादरम्यान झाली होती. निवेदिता यांच्या वडिलांनी आपल्या मुलीची ओळख अशोक सराफ यांच्याबरोबर करुन दिली होती. अशोक सराफ आणि निवेदिता जोशी यांची मैत्री झाली आणि त्यानंतर त्यांचे प्रेम जुळले. त्यानंतर अशोक सराफ यांना त्यांनी प्रपोज देखील केले. पण निवेदिता यांच्या कुटुंबियांना हे लग्न मान्य नव्हते. 'आपल्या मुलीने चित्रपट क्षेत्रातील व्यक्तीशी लग्न करू नये', अशी तिच्या आईची इच्छा होती. त्यामुळे त्यांच्या लग्नाला विरोध झाला. पण निवेदिता यांची मोठी बहीण डॉ. मीनल परांजपे यांनी पुढाकार घेत या लग्नासाठी कुटुंबाकडून परवानगी मिळवली. त्यानंतर त्या दोघांनी गोव्यातील मंगेशी मंदिरात जाऊन साधेपणाने लग्न केले. अशोक सराफ आणि निवेदिता यांनी अनेक चित्रपटात एकत्र काम केले आहे. अशोक आणि निवेदिता यांना अनिकेत नावाचा मुलगा आहे. (सर्व फोटो सौजन्य : निवेदिता सराफ/इन्स्टाग्राम) (हेही पाहा : अनघा भगरेचं डेनिम शॉर्ट्समध्ये बोल्ड फोटोशूट; ऋतुजा बागवेच्या कमेंटने वेधलं लक्ष)