Photos: घरच्यांच्या विरोधात जाऊन लग्न, भरमसाठ हुंडा; वैष्णवी हगवणेच्या लग्नाचे फोटो आले समोर…

Vaishnavi Hagawane Death: पुण्यातील मुळशी तालुक्यातील भुकूम येथे १६ मे २०२५ रोजी वैष्णवी शशांक हगवणे या २३ वर्षीय विवाहितेने गळफास घेऊन आत्महत्या केली. वैष्णवी राष्ट्रवादी काँग्रेसचे (अजित पवार गट) नेते राजेंद्र हगवणे यांची सून होती. वैष्णवीच्या मृत्यूमुळे राज्यभरात खळबळ उडाली आहे. वैष्णवीच्या माहेरच्यांनी आरोप केला आहे की, सासरच्या मंडळींनी हुंड्यासाठी तिचा मानसिक आणि शारीरिक छळ केला. लग्नाच्या वेळी ५१ तोळे सोने, एक फॉर्च्युनर कार आणि इतर महागड्या वस्तू दिल्या गेल्या होत्या. पण नंतरही वैष्णवीकडून आणखी पैशांची मागणी करण्यात आली आणि तिला घरातूनही बाहेर काढण्यात आले होते. वारंवार होणारा छळ सहन न झाल्याने तिने आत्महत्या केली. 'Brides Affair Pune' या इन्स्टाग्रामवरील पेजने शेअर केलेले वैष्णवीच्या लग्नातील फोटो सध्या व्हायरल झाले आहेत. वैष्णवी आणि शशांक यांचा प्रेमविवाह झाला होता. वैष्णवी आणि शशांक यांच्या लग्नाला वैष्णवीच्या घरातल्यांचा विरोध होता. विरोध पत्करुन वैष्णवीने लग्नाचा निर्णय घेतला. वैष्णवीच्या घरातल्यांनी थाटात तिचे लग्न करुन दिले होते. मात्र शशांक वैष्णवीच्या चारित्र्यावर संशय घेऊ लागला होता. वैष्णवीच्या वडिलांनी २०२३ मध्ये मुलगी गरोदर असताना शशांकने तिच्यावर संशय घेतल्याचं म्हटले होते. पोलीस तक्रारही केली होती. (सर्व फोटो सौजन्य : Brides Affair Pune/इन्स्टाग्राम)