पत्नीच्या हत्येप्रकरणात शिक्षा भोगल्यानंतर अल्पवयीन बहिण,भाऊ आणि आईच्या हत्येचा प्रयत्न; डोक्यात दगडी पाटा घालून मारहाण

समशेरअली हा मुंबई येथील शिवडीमध्ये राहत असताना त्याने त्याच्या पत्नीची हत्या केली होती. याप्रकरणी त्याला शिक्षा झाली होती. कारागृहात शिक्षा भोगल्यानंतर तो दोन महिन्यांपासून भिवंडी येथील गायत्रीनगर परिसरात त्याचे तीन भाऊ, आई, १५ वर्षीय बहिणीसोबत राहत होता. तो भिवंडी परिसरात वाहन चालवून उदरनिर्वाह करत होता. परंतु तो बहिणीला अत्यंत क्षुल्लक कारणांवरून मारहाण करत असे. २३ मार्चला रात्री त्याच्या बहिणीने घरासमोर राहणाऱ्या एका मुलाकडून वडापाव मागितला होता. या कारणावरून त्याने तिला मारहाण केली होती. तसेच जीवे मारण्याची धमकी दिली. तिच्या कुटुंबियांनी वाद मिटविल्यानंतर समशेरअली हा घरातून निघून गेला होता. त्यानंतर रात्री उशीरा तो पुन्हा घरी आला. तसेच कुटुंबियांकडे उत्तरप्रदेश येथील त्यांच्या जागेचा हिस्सा मागू लागला. याबाबत सकाळी बोलू असे कुटुंबियांनी त्याला सांगितले.

त्यानंतर सर्वजण झोपले. पहाटे तीन वाजताच्या सुमारास सर्वजण झोपले असताना, समशेरअली याने त्याची आई, भाऊ आणि बहिणीवर दगडी पाट्याने डोक्यावर हल्ला करण्यास सुरुवात केली. तसेच बहिणीला जीवे मारण्याची धमकी दिली. आरडाओरड झाल्यानंतर परिसरातील रहिवाशी त्यांच्या घरी आले. तेव्हा समशेरअली तेथून निघून गेला. त्यानंतर जखमी तिघांना भिवंडी येथील इंदिरा गांधी रुग्णालयात दाखल करण्यात आले. तेथून त्यांना ठाण्यातील जिल्हा शासकीय रुग्णालयात दाखल करण्यात आले. तेथील डाॅक्टरांनी त्यांना मुंबईतील सरकारी रुग्णालयात उपचार घेण्याचा सल्ला दिला. त्यानंतर तिघांना मुंबईतील नायर रुग्णालयात उपचारासाठी दाखल करण्यात आले. समशेरअली याच्या बहिणीच्या डोक्याला गंभीर मार लागल्याने तिच्यावर अतिदक्षता रुग्णालयात उपचार सुरू होते. तर त्याची आई आणि भाऊ यांना देखील दुखापत झाली आहे. याप्रकरणी समशेरअली विरोधात त्याच्या जखमी भावाने शांतीनगर पोलीस ठाण्यात तक्रार दाखल केली. या तक्रारीनंतर शांतीनगर पोलीस ठाण्यात गुन्हा दाखल झाला आहे. समशेरअली याचा शोध सुरू असल्याची माहिती शांतीनगर पोलिसांनी दिली.