शिल्पा शिरोडकरच्या वजनाविषयी वक्तव्य केल्यानंतर फराह खानने अभिनेत्रीला दिले ‘हे’ वचन; म्हणाली, “खूप वाईट…”

तेव्हा मी ट्रेनवर चढेन…

फराह खानने तिच्या नवीन व्लॉगमध्ये तिच्या कूक दिलीपसह शिल्पा शिरोडकरच्या घरी भेट दिली. यावेळी फराह खानने शिल्पा शिरोडकरचे कौतुक केले. यावेळी शिल्पा शिरोडकरने फराह खानला तिच्या वजनाविषयी केलेल्या वक्तव्याची आठवण करून दिली. त्यावर फराह खानने भविष्यात कधी छैय्या छैय्या-२ चे शूटिंग झालं, तर त्यामध्ये तुला कास्ट करेन, असे म्हणत आश्वस्त केले. यावर शिल्पाने हसत म्हटले की, तेव्हा मी ट्रेनवर चढेन, त्यावर डान्सर असतील आणि शाहरूख खानही असेल.

फराह खानने पुढे म्हटले की, जेव्हा शिल्पाने गाण्यात न घेण्याविषयी वक्तव्य केले त्यावेळी मला खूप वाईट वाटले. मी त्यावेळी विचार केला की, शिल्पा ट्रेनवर कशी चढेल? आणि जरी ती ट्रेनवर चढली, तर शाहरूख कुठे उभा राहील? त्यानंतर शिल्पा शिरोडकरने, फराहने तिला १५ दिवस वजन कमी करण्यासाठी दिले होते आणि त्यानंतरही नाकारले, अशी आठवण सांगितली.

शिल्पा शिरोडकरने नुकतीच सिद्धार्थ कननच्या यूट्यूब चॅनेलला मुलाखत दिली. या मुलाखतीत अभिनेत्रीने म्हटले, “मला त्या गाण्यात काम करता आलं नाही. कारण- मी जाड होते. त्यांनी मला मी लठ्ठ आहे, असं सांगितलं. मला छैय्या छैय्या या गाण्यात काम करण्याची संधी मिळाली नाही, याबद्दल नेहमी वाईट वाटतं. मात्र, देवानं मला कायमच त्यापेक्षा अधिक दिलं आहे आणि सध्याही तो देत आहे.”

दरम्यान, आता बिग बॉस १८ नंतर अभिनेत्री कोणत्या प्रोजेक्टमधून प्रेक्षकांच्या भेटीला येणार हे पाहणे महत्त्वाचे ठरणार आहे.