समुद्राचा नजारा ते जिम-स्पा सारख्या अत्याधुनिक सोयी, माधुरी दीक्षितच्या मुंबईतील नव्या घराचे फोटो समोर

बॉलिवूडमधील यशस्वी अभिनेत्रींपैकी एक म्हणून माधुरी दीक्षितला ओळखले जाते. आपल्या सौंदर्याने आणि नृत्याने चाहत्यांच्या मनावर राज्य करणारी ‘धक धक गर्ल’ अशीही तिची ओळख आहे. माधुरी दीक्षितने आतापर्यंत अनेक हिट चित्रपटात काम केले आहे. सध्या माधुरी ही 'झलक दिखला जा' या कार्यक्रमात परिक्षक म्हणून काम करत आहे. नुकतंच माधुरी दीक्षितने मुंबईतील वरळी परिसरात एक अलिशान घर खरेदी केलं आहे. यामुळे ती चर्चेत आली आहे. माधुरी दीक्षित आणि तिचे पती श्रीराम नेने यांनी सुपर प्रीमियम रेजिडेंशियल प्रोजेक्ट इंडियाबूल्स ब्लू या ठिकाणी नवीन घर खरेदी केले आहे. या टॉवरमध्ये ५३ व्या मजल्यावर त्या दोघांचे घर आहे. माधुरीचे हे नवीन घर ५,३८४ स्क्वेअर फूट इतके आहे. या घरातून समुद्राचा नजाराही पाहता येतो. या घराचे रजिस्ट्रेशन २८ सप्टेंबर २०२२ रोजी झाले होते. यात एक मोठा स्विमिंग पूल, फूटबॉल ग्राऊंड, जिम, स्पा, क्लब यांसारख्या अनेक अत्याधुनिक सोयी सुविधा पाहायला मिळत आहेत. घराबरोबर तिला सात गाड्यांसाठीचे पार्किंगही देण्यात आले आहेत. माधुरी दीक्षितने खरेदी केलेल्या नव्या घराची किंमत साधारण ४८ कोटी रुपये असल्याचे बोललं जात आहे. या घराची किंमत प्रति स्क्वेअर फूट ९० हजार रुपये आहे. नवीन घर खरेदी केल्यानंतर सध्या माधुरी ही प्रचंड आनंदी असल्याचे पाहायला मिळत आहे. दरम्यान माधुरी दीक्षितच्या कामाबद्दल बोलायचे झाले तर सध्या ती झलक दिखला जा यात दिसत आहे. काही दिवसांपूर्वी तिची प्रमुख भूमिका असलेली 'फेम गेम' ही वेबसीरीज प्रदर्शित झाली होती. याला प्रेक्षकांनी चांगला प्रतिसाद दिला होता. (सर्व फोटो - माधुरी दीक्षित, इंडियाब्लूस ब्लू इस्टेट अँड क्लब/ इन्स्टाग्राम)