PHOTOS : रस्त्यावर विटी दांडू, गोट्या, सापशिडी अन् मंगळागौरीचे खेळ खेळत राष्ट्रवादी काँग्रेसने नोंदवला राज्य सरकारचा निषेध

राज्य सरकारने दहीहंडीचा क्रिडा प्रकारामध्ये समावेश केल्यावर मुख्यमंत्री एकनाथ शिंदे यांनी सरकारी नोकरीत पाच टक्के आरक्षणाची घोषणा केली. त्यामुळे वर्षानुवर्षे स्पर्धा परीक्षेची तयारी करणाऱ्या विद्यार्थी वर्गात नाराजी पाहण्यास मिळाली. त्याच दरम्यान भाजपाचे मंत्री चंद्रकांत पाटील यांनी देखील विटी दांडू खेळणाऱ्याला देखील आरक्षण देण्यास काही हरकत नसल्याची भूमिका मांडली होती या विधानाच्या पार्श्वभूमीवर आज पुण्यात विद्यार्थी आणि राज्य सरकारचे विरोधक आक्रमक झाले असून, ठिकठिकाणी आंदोलन केले जात आहे. आज पुण्यातील फर्ग्युसन रोडवर राष्ट्रवादी काँग्रेसच्यावतीने विटी दांडू, गोट्या, सापशिडी, भोवरा खेळून राज्य सरकारचा निषेध नोंदविला. यावेळी महिला कार्यकर्त्यांनी मंगळागौरीचे खेळ खेळत आंदोलनात सहभाग नोंदवला. अभ्यास सोडा दहिहंडी फोडा, असे फलक दर्शवून निषेध नोंदवला गेला. तरूण कार्यकर्त्यांनी फूटपाथवरच बैठक मांडत पत्ते खेळले तर काही कार्यकर्त्यांनी विटी दांडूचा खेळ सुरू केला. काही कार्यकर्त्यांनी गोट्या खेळल्या. दोरीवरील उड्ड्या मारण्याचा देखील खेळ खेळला गेला. तरुणींनी बैठक मांडत सापशिडीची खेळ सुरू केला डोंबाऱ्याचा खेळ दाखवला गेला. एमपीएससीचा दर्जा कमी लेखणाऱ्या सरकारचा धिक्कार असो, असेहीा फलक दर्शवले गेले. “विश्वासघात आणि ५० खोके घेऊन राज्यात ‘ईडी’ सरकार आलं आहे.” “केवळ घोषणाबाजी करण्यात हे ‘ईडी’ सरकार व्यस्त आहे.” “या सरकारने मागील ४० दिवसांत शेतकरी, सर्व सामान्य नागरिक आणि विद्यार्थ्यांच्या दृष्टीने निर्णय घेतले नाहीत.” असे आरोप करण्यात आले. या ‘ईडी’ सरकारने विद्यार्थ्यांची माफी मागावी अशी मागणी देखील राष्ट्रवादी काँग्रेसने केली आहे.