कल्याणमध्ये अल्पवयीन मुलीसमोर नग्न होणाऱ्या वडिलांना अटक

याप्रकरणी मुलीच्या आईने बुधवारी मानपाडा पोलीस ठाण्यात तक्रार केली आहे.पोलिसांनी सांगितले, कल्याण पूर्वेतील मलंग रस्त्यावरील काका ढाबा परिसरात एक कुटुंब राहते. घरात ३६ वर्षाचे पती आणि त्यांची तेवढ्याच वयाची पत्नी राहते. त्यांना एक अल्पवयीन मुलगी आहे. पत्नी नागपूर येथे शिक्षण घेते. या कालावधीत घरात अल्पवयीन मुलीचा सांभाळ या महिलेचा पती करतो. मार्च महिन्यात पत्नी नागपूर येथे अल्पवयीन मुलीला पतीजवळ ठेऊन शिक्षणासाठी गेली. मुलीचा योग्यरितीने सांभाळ करणे हे पतीचे काम होते.

हे ही वाचा…घोडबंदर मार्गावरील उड्डाणपूलावर पुन्हा अपघात, एसटी बसगाडी कठड्याला धडकली

नागपूर येथे असताना पत्नीने आपल्या पतीच्या मोबाईलवर व्हिडिओने संपर्क केला. मुलगी कशी आहे, अशी विचारपूस केली. आईचा फोन आल्याचे कळल्यावर भेदरलेल्या मुलीने रडण्यास सुरूवात केली. पत्नीला मुलीच्या मोठयाने रडण्याचा आवाज आला. तिने पतीला मुलगी का रडते असे प्रश्न केले. तिने पतीला मोबाईल मुलीच्या दिशेने फिरवायला सांगितला. त्यावेळी ती दृश्यचित्रफितीमध्ये घाबरलेली आणि खूप रडत असल्याचे दिसले.

हे ही वाचा…वाहतूक पोलिसांना ठोस उपाय मिळेना, नियोजनशुन्य कारभारामुळे प्रवास नकोसा

तिने पतीला मोबाईल मुलीच्या ताब्यात देण्यास सांगितले. मुलीला तिने बाळा तू का रडत आहेस अशी विचारणा केली. तिने आईला सांगितले, रात्रीच्या वेळेत बाबांनी अंगावरील सर्व कपडे काढून टाकले होते. ते बिछान्यावर पडून होते. त्या गोष्टीची मला खूप भीती वाटत आहे. त्यामुळे आपण रडत असल्याचे आईला सांगितले. हा सगळा प्रकार पाहून पीडित मुलीच्या आईला धक्का बसला. तिने याविषयी पतीची कानऊघडणी केली. नागपूर येथून मुलीची आई कल्याणमध्ये आल्यावर तिने बुधवारी मानपाडा पोलीस ठाण्यात जाऊन पती विरुध्द तक्रार केली. पोलिसांनी बाल लैंगिक अत्याचार कायद्याने गुन्हा दाखल करून पीडित मुलीच्या वडिलांना अटक केली. वरिष्ठ पोलीस निरीक्षक विजय कादबाने यांच्या नेतृत्वाखाली साहाय्यक पोलीस निरीक्षक संदीप गोरे तपास करत आहेत