अभ्यासाला कंटाळून सातवीच्या विद्यार्थ्यांची आत्महत्या

शहापूर तालुक्यातील खुटघर येथे सातवीमध्ये शिकणाऱ्या सोहम सणस या तेरा वर्षीय विद्यार्थ्यांने अभ्यासाला कंटाळून भातसा नदीत उडी मारून आत्महत्या केल्याची खळबळजनक घटना घडली आहे.  शहापूर तालुक्यातील पी.एस.देशमुख इंग्रजी माध्यमाच्या शाळेत सातवीत  शिकणारा सोहम गुरुवारी संध्याकाळ झाली तरी घरी परतला नव्हता, मात्र त्याचे दप्तर घरातच होते. यावेळी त्याच्या आईने दप्तराची तपासणी केली असता त्यामध्ये ‘तुम्ही मला चांगले शिकवले, मी आता जग सोडून जातो, तुम्ही नाराज होऊ नका’ अशी चिठ्ठी आढळून आली. यानंतर लगेचच सोहमच्या पालकांनी शहापूर पोलिसांकडे धाव घेऊन तो बेपत्ता असल्याची तक्रार नोंदवली. त्यानंतर शुक्रवारी सकाळी ११च्या सुमारास खुटघर स्मशानभूमीसमोर भातसा नदीच्या पात्रात सोहमचा मृतदेह पोलिसांना आढळून आला. यानंतर लगेच अग्निशमन दलाला पाचारण करण्यात आले. याबाबत शहापूर पोलीस अधिक तपास करत आहेत.