पोलिसांना गुंगारा देत आरोपी पळाला

जबरी चोरीच्या गुन्ह्यात अटकेत असणाऱ्या एका आरोपीने शुक्रवारी सकाळी पोलिसांच्या हातावर तुरी देऊन पळ काढल्याचा प्रकार घडला. आसिफ शेख असे या आरोपीचे नाव असून त्याला ठाणे सत्र न्यायालयात हजर करण्यासाठी पोलीस नेत होते. ठाणे टपाल कार्यालयाजवळ येताच त्याने पोलिसांना गुंगारा देत राबोडीच्या दिशेने पळ काढला.
पोलीस सूत्रांकडून मिळालेल्या माहितीनुसार, आसिफ शेख या आरोपीस काशिमीरा पोलिसांनी जबरी चोरी तसेच अवैधपणे शस्त्र बाळगल्याप्रकरणी अटक केली होती. गेल्या काही दिवसांपासून तो ठाणे कारागृहात बंदिस्त होता. शुक्रवारी सकाळी सुनावणीसाठी त्याला ठाणे सत्र न्यायालयात नेण्यासाठी ठाणे ग्रामीण पोलिसांचे एक पथक हजर झाले. नेहमीप्रमाणे त्याचे हात बांधून न्यायालयाच्या दिशेने नेत असताना टपाल कार्यालयालगत पोलीस कर्मचाऱ्यांना धक्का मारून त्याने तेथून पळ काढला.
दरम्यान, आसिफ राबोडीच्या दिशेने पळाल्याची माहिती पोलिसांना मिळाली असून दिवसभर त्याचा शोध सुरू होता. या प्रकरणी ठाणे शहर पोलीस ठाण्यात रात्री उशिरा नोंद करण्यात आली.