इंग्लंडमध्ये सुरु असलेल्या विश्वचषक स्पर्धेत भारताचा सलामीचा सामना दक्षिण आफ्रिकेशी होत आहे. या सामन्याआधी दक्षिण आफ्रिकेला मोठा धक्का बसला. आफ्रिकेचा आघाडीचा गोलंदाज डेल स्टेन हा खांद्याच्या दुखापतीमुळे विश्वचषक स्पर्धेतून बाहेर झाला. त्याच्या जागी डावखुरा वेगवान गोलंदाज ब्युरोन हॅन्ड्रिक्स याला संघात स्थान देण्यात आले. पण या दुखापतीसाठी IPL जबाबदार असल्याचा आरोप डु प्लेसिसने केला आहे.
आफ्रिकेच्या पहिल्या २ सामन्यातही स्टेन दुखापतीमुळे संघाबाहेर होता. त्यामुळे आफ्रिकेची ‘स्टेन’गन धडाडण्याआधीच थंडावली. याबाबत बोलताना डु प्लेसिस म्हणाला की स्टेनच्या दुखापतीने IPL दरम्यान उचल खाल्ली. तो या स्पर्धेत दोन सामने खेळला, त्यावेळी दुर्दैवाने त्याला हा त्रास पुन्हा सुरु झाला. त्याने जर IPL मध्ये खेळण्याचा पर्याय निवडला नसता, तर कदाचित आज तो तंदुरुस्त असण्याची शक्यता नाकारता आली नसती.
डेल स्टेनचा हा शेवटचा विश्वचषक होता. मात्र खांद्याच्या दुखापतीमुळे शेवटचा विश्वचषकदेखील त्याला खेळता आला नाही. आफ्रिकेचा पहिला सामना इंग्लंडविरुद्ध झाला, तर दुसरा सामना बांगलादेशविरुद्ध झाला. या दोनही सामन्यात डेल स्टेन खेळू शकला नाही. खांद्याच्या दुखापतीने त्याला जायबंदी केले होते. त्यानंतर भारताविरुद्धच्या सामन्याआधी स्टेनच्या दुखापतीची पुन्हा एकदा तपासणी करण्यात आली. परिणामी त्याला दुखापतीमुळे माघार घ्यावी लागणार असल्याचे स्पष्ट करण्यात आले आणि त्याच्या जागी डावखुरा वेगवान गोलंदाज याला संघात स्थान देण्यात आले.
डेल स्टेन IPL 2019 मध्ये बंगळुरू संघाचा भाग होता. पण त्याच्या खांद्याच्या दुखापतीमुळे त्याला फार सामने खेळणे शक्य झाले नाही. त्याने बंगळुरूकडून २ सामने खेळले. त्यात त्याची कामगिरी चांगली झाली. पण २ सामन्यानंतर तो दुखापतीमुळे आफ्रिकेला परतला होता.
दरम्यान, “क्रिकेटपमधून निवृत्त होण्याआधी मला माझ्या संघाला विश्वचषकाची ट्रॉफी मिळवून द्यायची आहे. या विश्वचषक स्पर्धेत खेळताना मी माझे सर्वस्व पणाला लावून खेळेन. माझ्या घरात अनेक महत्वाच्या ट्रॉफी आहेत, पण विश्वचषक विजेतेपदाची ट्रॉफी नाही. त्यामुळे मी आंतरराष्ट्रीय किर्केटमधून निवृत्त होण्याआधी मला माझ्यात संघाला विश्वविजेता करायचे आहे. आमच्या संघात चांगले फलंदाज आहेत. ३ ते ४ अष्टपैलू खेळाडू आहेत. तुम्ही संघ पाहिलात तर तुम्हाला एक बाब नक्कीच लक्षात येईल की हे खेळाडू सर्वोत्तम नसले तरी प्रतिभावान आहेत. विश्वचषक स्पर्धेचे वातावरणच खेळाडूंना सर्वोत्तम कामगिरी करण्यासाठी प्रेरणा देईल. त्यामुळे विश्वचषकातील आफ्रिकेचा भूतकाळ विसरुन खेळाडू खेळले तर त्याचा नक्कीच स्पर्धेत फायदा होईल”, असे स्टेनने स्पर्धेआधी म्हटले होते. पण त्याला या स्पर्धेत खेळता आले नाही.
“दुखापतीमुळे स्टेनला स्पर्धेबाहेर व्हावे लागणे दुर्दैवी”
स्टेनच्या दुखापतीचे समजल्यानंतर दुःख झाले. तो खूप चांगली कामगिरी करत होता. त्याने चांगली गोलंदाजी केली आहे. IPL मध्ये तो आणि मी RCB मधून खेळलो. तो खूपच प्रेरणादायी खेळ करू शकतो, त्यामुळे त्याला दुखापतीमुळे स्पर्धेबाहेर व्हावे लागले या गोष्टीचे मला फारच वाईट वाटले. त्याने लवकर तंदुरुस्त व्हावे हीच प्रार्थना, असे विराट म्हणाला.