गुप्तचर यंत्रणांकडून मिळालेल्या ताज्या माहितीनुसार पाकिस्तान अफगाणिस्तानातून दहशतवाद्यांना काश्मीरमध्ये आणण्याचे प्लानिंग करत आहे. पाकिस्तान व्याप्त काश्मीरमधील लाँच पॅडसवरुन या दहशतवाद्यांना काश्मीरमध्ये घुसवण्याची योजना आहे. जम्मू-काश्मीरला विशेष राज्याचा दर्जा देणारे कलम ३७० रद्द केल्यापासून पाकिस्तान भारतात घातपात घडवण्याच्या योजना आखत आहे. इंडिया टुडेने हे वृत्त दिले आहे.
नवी दिल्लीत घातपाती कारवाया घडवून आणण्यासाठी पाकिस्तानने अफगाणिस्तानात दहशतवाद्यांना तयार केल्याची दुसरी माहिती आहे. काश्मीरमध्ये सुरक्षा दलांना हे दहशतवादी लक्ष्य करु शकतात. काश्मीरमधील राजकीय नेत्यांनाही हे दहशतवादी टार्गेट करु शकतात अशी गुप्तचरांची माहिती आहे.
‘रॉ’ च्या रिपोर्टनुसार जैश-ए-मोहम्मदने जम्मू-काश्मीरमधील सुरक्षा यंत्रणांना लक्ष्य करण्याच कट रचला आहे. पाकिस्तानात बहावलपूरमध्ये मारकाज उस्मान-ओ-अली येथे १९ ऑगस्टला बैठक झाल्याची माहिती आहे. जैशचा म्होरक्या मसूद अझहरचा भाऊ रौफ अझगरने या बैठकीचे नेतृत्व केले अशी सूत्रांची माहिती आहे.