छोट्या पडद्यावरील अतिशय लोकप्रिय आणि तितकाच वादग्रस्त शो म्हणजे बिग बॉस. या शोमध्ये सतत स्पर्धकांमध्ये भांडणे आणि वाद होताना दिसत आहे. काही दिवसांपूर्वीच ‘बिग बॉस १५’मध्ये व्हीआयपी स्पर्धक म्हणून अभिजीत बिचुकले, राखी सावंत आणि तिचा पती रितेश, देवोलिना भट्टाचार्जी आणि रश्मि देसाई यांची एण्ट्री झाली. त्यानंतर राखी, रितेश आणि अभिजीत यांच्यामध्ये चांगला बाँड असल्याचे पाहायला मिळाले. पण आता राखी आणि अभिजीतमध्ये चांगलेच भांडण झाल्याचे दिसणार आहे.
कलर्स टीव्हीने त्यांच्या अधिकृत इन्स्टाग्राम अकाऊंटवर बिग बॉस १५च्या आगामी भागाचा प्रोमो शेअर केला आहे. या प्रोमोमध्ये अभिजीत राखीला म्हणतो, ‘तू पती कुठन तरी शोधून आणला आहेस.’ ते ऐकून राखी प्रचंड चिडते आणि अभिजीतला म्हणते, ‘तू मला म्हणालास माझा पती भाड्याने आणला आहेस? तू भाड्याचा आहे.’
राखी आणि अभिजीतमध्ये चांगलेच भांडण होते. राखीला इतका राग अनावर होतो की ती घरात तोडफोड करताना दिसते. ती अभिजीतची बॅग फेकून देते, त्यानंतर घरातील खूर्ची जोरात तोडते. इतकच काय ती रागात अभिजीतचे केस देखील ओढते. अभिजीत आणि राखीच्या भांडणाचा हा व्हिडीओ सध्या सोशल मीडियावर तुफान व्हायरल झाला आहे.