‘फरारी की सवारी’ चित्रपटातून हिंदी तर ‘व्हेंटिलेटर’मधून मराठी दिग्दर्शनात पदार्पण करणारे राष्ट्रीय पुरस्कार विजेते दिग्दर्शक राजेश मापुसकर आता गांधी हत्येसंदर्भातील वेबसीरिज प्रेक्षकांसाठी घेऊन येत आहेत. या वेब सीरिजमध्ये मनोहर मालगावकर लिखित ‘दी मेन हू किल्ड गांधी’ (The Men who killed Gandhi) या पुस्तकात उल्लेखलेल्या घटना आणि गांधींजींच्या हत्येवेळी भारतातील परिस्थिती यांचे चित्रण असणार आहे.
वाचा : जाणून घ्या शिवाजी महाराजांवरील चित्रपटाचे चित्रीकरण केव्हा होणार?
‘लगे रहो मुन्नाभाई’ चित्रपटाच्या चित्रीकरणापासूनच गांधींजींच्या विचारांचा प्रभाव आपल्यावर असल्याचे म्हणत, ही सीरिज दिग्दर्शित करण्यासाठी आपण उत्सुक असल्याचे राजेश मापुसकर म्हणाले. केवळ दिग्दर्शनच नव्हे तर सहनिर्मितीची धुरा ही राजेश हेच सांभाळणार आहेत. तर या सीरिजची निर्मिती अबंडेंटिया एण्टरटेन्मेन्ट करणार आहे.
वाचा : प्रिया बापटच्या आयुष्यात खास व्यक्तीचे आगमन
एकंदर या प्रोजेक्टविषयी विचार मांडताना राजेश मापुसकर म्हणाले, ‘इतिहास मला मोहिनी घालतो. लगे रहो मुन्नाभाईच्या चित्रिकरणावेळी सहायक दिग्दर्शक म्हणून काम पाहताना गांधींजींच्या विचारांचा प्रभाव माझ्यावर पडत होता. आज १२ वर्षांनी, गांधीहत्येवर वेबसीरिज तयार करण्यासाठी विक्रम मल्होत्राने मला विचारणा केली आणि मी लगेचच होकार कळवला. यानिमित्ताने दुसरी बाजू समजून घेण्याची संधी मिळाल्याचा मला नक्कीच आनंद आहे. नाण्याची ही दुसरी बाजू मी योग्यरित्या प्रेक्षकांसमोर मांडू शकेन, अशी आशा आहे.’