मेष : पर्यायी मार्ग शोधा

दिनांक १६, १९, २०, २१ या दिवसांत विचार करून बोला. कारण नसताना एखादी गोष्ट आंगलट येऊ शकते. इतरांच्या काही गोष्टी नाही पटल्या तरी त्या पटवून घ्याव्या लागतील. सध्या हो म्हणा व सोडून द्या. त्यावर प्रतिक्रिया देत बसू नक्रा. परिणामी तुम्हाला त्रास होणार नाही. एकाच गोष्टीवर अडून बसू नका. पर्यायी मार्ग शोधा. एक घाव दोन तुकडे करून काहीही साध्य होणार नाही. वटपौर्णिमा कालावधीत शांततेने निर्णय घ्या. व्यवसायात खरेदी विक्रीचे व्यवहार करताना भावनिक गोष्टी टाळा. नोकरदार वर्गाला वरिष्ठांच्या मर्जीने काम करावे लागेल. आर्थिक बचत करणे योग्य राहील. कुटुंबाचा राग राग करू नका. जोडीदाराचा आदर करा. आध्यात्मिक गोष्टीत गुंतून राहा. मानसिकता जपा. आरोग्याची काळजी घ्या.

शुभ दिनांक : १७, २२

महिलांसाठी : सहनशीलता वाढवा.

वृषभ : संयम ठेवा

षष्ठस्थानातून अष्टमस्थानाकडे चंद्राचे भ्रमण होत आहे. सर्व दिवस जपून पाऊल टाकावे लागेल. असे ज्यावेळी भ्रमण असते त्यावेळी एक गोष्ट लक्षात ठेवा. जबरदस्तीने कोणती गोष्ट करायला गेलात तर त्याचा त्रास वाढतो. त्यापेक्षा ती गोष्ट न केलेली चांगली. थोडा धीर धरा, म्हणजे त्रास होणार नाही. कोणी काय करावे वा काय करू नये याचा सल्ला कोणाला देत बसू नका. कोणतेही व्यवहार करताना भावनिक गोष्टी टाळा. प्रत्येक गोष्टीत संयम ठेवा. पौर्णिमा शुभ राहील. व्यावसायिकदृष्ट्या धावपळ होईल. नोकरदार वर्गाच्या कामकाजात बदल होतील. खर्च कमी करा. मुलांसाठी वेळ द्यावा लागेल. कौटुंबिक मतभेद दूर ठेवा. जोडीदाराच्या साह्याने निर्णय घ्या. विचारपूर्वक वागा. आरोग्याची काळजी घ्या. योग साधनेला महत्त्व द्या.

शुभ दिनांक : १६, २०

महिलांसाठी : योग्य समन्वय साधा. विचारपूर्वक निर्णय घ्या.

मिथुन : स्पष्ट बोलणे टाळा

दिनांक १९, २०, २१ हे तीन दिवस सतर्क राहून काम करावे लागेल. एकाच गोष्टीवर अडून राहून चालणार नाही. सध्या आपण म्हणाल ती पूर्व दिशा असणार नाही. समोरच्याचे ऐकून घ्यावे लागेल अशी स्थिती निर्माण होईल. तुम्ही काय बोलता वा काय बोलत नाही याचे भानही तुम्हाला राहणार नाही. मात्र या कालावधीत स्पष्ट बोलणे टाळा. म्हणजे त्याचा तुम्हाला त्रास होणार नाही. आपले काम भले नि आपण भले हे सूत्र लक्षात ठेवा. पौर्णिमा कालावधी शांततेत घालवा. बाकी दिवस चांगले असतील. आर्थिकदृष्ट्या कोणताही व्यवहार करताना घाई करू नका. व्यवसायात प्रगती होईल. नोकरदार वर्गाला कामावर पूर्णपणे लक्ष केंद्रित करावे लागेल. समाजसेवेची आवड राहील. मुलांची प्रगती होईल. घरगुती वातावरण चांगले राहील. प्रकृतीची काळजी घ्या.

शुभ दिनांक : १७, १८

महिलांसाठी : हस्तक्षेप टाळा. स्वत:च्या कामाकडे लक्ष द्या.

कर्क : मालकीहक्क मिळेल

दिनांक २२ रोजीचा एकच दिवस सोडला तर बाकी दिवसांचा कालावधी उत्तम असेल. चांगल्या कालावधीमध्ये बाकी राहिलेली बरीच कामे होऊन जातील. तेव्हा घाई करून काम करण्याचा प्रयत्न करा. इतरांची वेळेत मदत मिळेल. सध्या तुम्ही म्हणाल ती पूर्व दिशा असणार आहे, तेव्हा या संधीचा फायदा घ्या. पौर्णिमा कालावधी शुभ राहील. बाकी दिवस चांगले असतील. व्यावसायिकदृष्ट्या गुंतवणूक फायद्याची ठरेल. नोकरदार वर्गाला वरिष्ठांची शाब्बासकी मिळेल. आर्थिक चणचण भासणार नाही. घरामध्ये स्थावर मालमत्तेचा प्रश्न निकालात लागेल. मालकी हक्क मिळेल. आरोग्याच्या तक्रारी दूर होतील, त्यामुळे मनस्वास्थ्य लाभले.

शुभ दिनांक : १९, २०

महिलांसाठी : ठरवलेले ध्येय गाठाल. मन आनंदी राहील.

सिंह : कामे वेळेत पूर्ण होतील

सप्ताहात सर्व दिवस चांगले असतील. कोणत्याही कामाची काळजी करण्याची गरज भासणार नाही. पौर्णिमा कालावधीत महत्त्वाचे काम होईल. कामे अगदी वेळेत पूर्ण होतील. ठरवून एखादी गोष्ट होत नाही. मात्र सध्या न ठरवतासुद्धा काही गोष्टी अचानकपणे मार्गी लागतील. मागील पोकळी भरून काढाल. आतापर्यंत मनामध्ये नकारात्मक विचार येत होते ते सध्या येणार नाहीत. सकारात्मक गोष्टी घडू लागतील. वाटचाल सुलभतेकडे राहील. व्यवसायात आलेले प्रस्ताव चांगले असतील. नोकरदार वर्गाला जबाबदारी पार पाडावी लागेल. आर्थिक बचत कराल. नातेवाईकांच्या कार्यक्रमानिमित्त भेटीगाठी होतील. भावंडांशी संवाद साधाल. शेजाऱ्यांना मदत कराल. आरोग्य उत्तम राहील.

शुभ दिनांक : २१, २२

महिलांसाठी : निवारण मार्ग निघेल.

कन्या : उत्कर्ष होईल

सर्व दिवस शुभ राहतील. पौर्णिमा कालावधी धडाडीचा राहील. चांगल्या कामासाठी वेळ लागणार नाही. आतापर्यंत धावपळ होत होती, मात्र ही धावपळ आता कमी होणार आहे. परिणामी तुम्हालाही थोडीशी कामातून उसंत घेता येईल. जे काही निर्णय घ्याल ते निर्णय यशस्वी होतील. कोणावर अवलंबून राहण्याची वेळ येणार नाही. स्वत:चे काम स्वत: कराल. उत्कर्ष होईल. ठरवल्याप्रमाणे अनेक गोष्टी घडू लागतील. व्यवसायात चाललेल्या घडामोडींत जबाबदारीने पाऊल टाकाल, त्यामुळे नुकसान होणार नाही. नोकरदार वर्गाचे कामकाज सुरळीत चालू राहील. आर्थिक नियोजन मार्गी लागेल. राजकीय क्षेत्रात मानाचे स्थान मिळेल.

नातेवाईकांच्या शुभेच्छा पाठीशी राहतील. भावंडांशी असलेले मतभेद दूर होतील. आरोग्य उत्तम राहील.

शुभ दिनांक : १६, १७

महिलांसाठी : हाती घेतलेले काम पूर्ण कराल. मन प्रसन्न राहील.

तूळ : महत्त्वाची कामे होतील

दिनांक १६ रोजीचा एकच दिवस फारसा अनुकूल नाही; तेव्हा एवढा एकच दिवस काळजी घ्या. बाकी दिवसांचा कालावधी उत्तम राहील. पौर्णिमा कालावधीत धनलाभ होईल. चांगला कालावधी म्हणजे चांगल्या गोष्टी घडतात असे म्हणायला हरकत नाही. सध्या असेच वातावरण आहे. कोणत्याही गोष्टीसाठी संघर्ष करावा लागणार नाही. महत्त्वाची कामे पूर्ण होतील. व्यवसायात आतापर्यंत चढउतार जाणवत होता. आता हाती घेतलेले काम तडीस न्याल. आश्वासने वेळेत पूर्ण कराल. नोकरदार वर्गाला वरिष्ठांचे सहकार्य मिळेल. आर्थिक बाबतीत समाधानाची बाब राहील.

कौटुंबिक वातावरण आनंदी राहील. मानसिक समाधान लाभेल. शारीरिकदृष्ट्या होणारा त्रास दूर होईल.

शुभ दिनांक : १७, १८

महिलांसाठी : कामाचा अंदाज घ्या.

वृश्चिक : व्यवहार जपून करा

दिनांक १७, १८ हे संपूर्ण दोन दिवस ताणतणावाचे असतील. मात्र ताणतणाव घेऊन कोणतीही गोष्ट साध्य होणार नाही, त्यातून पर्यायी मार्ग काढणे खूप गरजेचे राहील. एक घाव दोन तुकडे करून चालणार नाही. शांततेच्या मार्गाने गोष्टी हाताळाव्या लागतील. या वातावरणात सकारात्मक विचार करायला शिका. म्हणजे नुकसान होणार नाही. पौर्णिमा तुमच्या राशीतूनच होत आहे. ती शुभ राहील. बाकी दिवसांचा कालावधी चांगला असेल. व्यवसायात आवक-जावक उत्तम राहील. नोकरदार वर्गाच्या कामातील तांत्रिक अडचणी दूर होतील. आर्थिक व्यवहार जपून करा. समाजमाध्यमांचा वापर जेवढ्यास तेवढा करा. जोडीदाराची साथ मिळेल. योगसधनेला महत्त्व द्या. सकारात्मक विचारांवर भर द्या.

शुभ दिनांक : २०, २१

महिलांसाठी : ज्येष्ठांची मदत मिळेल. मन प्रसन्न राहील.

धनू : सहनशीलता वाढवा

दिनांक १९, २०, २१ हे तीन दिवस कसे चांगले घालवता येतील ते पाहा. काही गोष्टी तुमच्या मनाविरोधी घडू शकतात. त्यामुळे तुमच्या रागाचा पारा चढू शकतो. परिणामी बरेच काही नुकसान होऊ शकते. त्यापेक्षा एक गोष्ट लक्षात ठेवा की, ज्या वेळी असे वातावरण असते त्या वेळी आपण शांत राहणे खूप गरजेचे असते. तुम्ही शांत राहिलात तर कोणतेही नुकसान होणार नाही. तेव्हा सहनशीलता वाढवा. पौर्णिमा कालावधीत वादविवाद टाळा. बाकी दिवस ठीक असतील. व्यवसायात नवीन काही करण्याचे नियोजन यशस्वी करण्यासाठी धावपळ होईल. नोकरदार वर्गाला कामात व्यस्त राहावे लागेल. खर्च जपून करा. जोडीदाराचा सल्ला घ्या. आध्यात्मिक गोष्टीत गुंतून राहा. मानसिक, शारीरिक स्वास्थ्य जपा.

शुभ दिनांक : १७, २२

महिलांसाठी : तडजोड केल्याने बरेच काही साध्य होईल.

मकर : प्रतिष्ठा वाढेल

२२ तारखेचा एकच दिवस सोडला तर बाकी दिवसांचा कालावधी उत्तम राहील. पौर्णिमा लाभदायक राहील. भाग्यस्थानातून लाभस्थानाकडे चंद्राचे भ्रमण होत आहे. बऱ्याच दिवसांतून असे वातावरण आले आहे. चांगले दिवस असतात तेव्हा वेळ घालवत बसू नका. त्याचा पुरेपूर वापर करून घ्या. जे काम तुम्हाला करायचे आहे आणि ते पूर्ण होत नाही त्या कामाचा श्रीगणेशा आता करायला हरकत नाही. सध्या तुमचे काम होणार आहे. व्यवसायातून अपेक्षेपेक्षा जास्त प्रमाणात उत्पन्न मिळेल. नोकरदार वर्गाचे काम वेळेत पूर्ण होईल. आर्थिक अडचण जाणवणार नाही. राजकीय क्षेत्रात प्रतिष्ठा वाढेल. नातेवाईकांशी जिव्हाळा वाढेल. मानसिक ताणतणाव कमी होईल.

आरोग्य उत्तम राहील.

शुभ दिनांक : २०, २१

महिलांसाठी : घेतलेले निर्णय यशस्वी होतील. परिणामी मन आनंदी राहील.

कुंभ : अनुकूल वातावरण

दिनांक १६ रोजी या एकाच दिवशी कोणतेही महत्त्वाचे निर्णय घेऊ नका. बाकी दिवसांचा कालावधी उत्तम राहील. पौर्णिमा कालावधीत ज्येष्ठांची मदत मिळेल. स्वत:च्या कामाव्यतिरिक्त इतर गोष्टीत लक्ष घालायला वेळ मिळणार नाही. तुमचे काम मात्र साध्य होणार आहे. दुसऱ्याने केलेले मार्गदर्शन सध्या मोलाचे ठरणार आहे. व्यवसायात लाभाचे प्रमाण चांगले राहील. नोकरदार वर्गाला काम करताना कोणतीही तडजोड स्वीकारावी लागणार नाही. आर्थिक सफलता मिळेल. राजकीय क्षेत्रात महत्त्वाच्या गोष्टीवर चर्चा होईल. घरगुती वातावरण अनुकूल राहील. मानसिक समाधान लाभेल. प्रकृतीत सुधारणा होईल.

शुभ दिनांक : १७, २२

महिलांसाठी : समीकरण जुळून येईल.

मीन : प्रकृती जपा

दिनांक १७, १८ हे दोन दिवस फारसे अनुकूल नाहीत. तेव्हा या दोन दिवसांत कोणतेही निर्णय घेताना विचार करा. विचार केल्याशिवाय घाईने निर्णय घेऊ नका. ज्या गोष्टीतून मनस्तापच होणार आहे तिथे शांत राहणे सर्वात उत्तम राहील. स्वत:च्या कामाची जबाबदारी इतरांवर टाकू नका. चांगल्या गोष्टींसाठी उशीर झाला तरी चालेल, हे ब्रीदवाक्य ध्यानी ठेवा. तुमच्यासाठी पौर्णिमा भाग्यस्थानातून होत आहे. हा दिवस शुभ राहील. बाकी दिवसांचा कालावधीही चांगला असेल. व्यवसायातून मनासारखे उत्पन्न मिळेल. नोकरदार वर्गाला अधिकारप्राप्ती होईल. आर्थिक प्रश्न मिटेल. कुटुंबात असणारे मतभेद दूर होण्यासाठी प्रयत्न वाढवा.

नातेवाईकांच्या सुखदु:खात सहभागी व्हाल. धार्मिक कार्य सफल होईल. मनाची द्विधा अवस्था दूर होईल. प्रकृती जपा.

शुभ दिनांक : २०, २१

महिलांसाठी : मनसुबे पूर्ण होतील.