मेष : खर्च जपून करा

दिनांक १६, १७ हे दोन दिवस अनुकूल नाहीत, त्यामुळे हे दोन दिवस कोणतेही निर्णय घेताना विचार करा. जमणार आहे अशाच गोष्टींचा नाद करा. ज्या गोष्टींपासून आपल्याला त्रास होणार आहे अशा गोष्टींच्या नादी लागू नका. एखाद्याला तुमचा सल्ला पटेल किंवा न पटेल, पण या दिवसांत तरी तो कोणाला द्यायला जाऊ नका. इतरांनी काय करावे यापेक्षा स्वत:ला काही करायचे आहे ते ठरवा. बाकी दिवस चांगले असतील. चांगल्या दिवसांमध्ये चांगल्या घडामोडी घडतील. व्यवसायातून मिळणारे उत्पन्न चांगले असेल. नोकरदार वर्गाला कामाच्या संदर्भात तांत्रिक अडचणी आल्या तरी त्यावर पर्यायी मार्ग मिळेल. खर्च जपून करा. समाजसेवेची आवड राहील. मुलांचे लाड करा, पण शिस्त बिघडू देऊ नका. जोडीदाराची मदत मिळेल. धार्मिक गोष्टींसाठी वेळ द्याल. आरोग्याची काळजी घ्या.

शुभ दिनांक : १४, १८

महिलांसाठी : जबाबदारी दुसऱ्यांवर सोपवू नका.

वृषभ : भाग्योदय होईल

दिनांक १८, १९ हे दोन दिवस कसरतीचे असतील, करण या दिवसांत तुम्हाला स्वत:साठी वेळ मिळणार नाही. इतरांचीच कामे करण्यात वेळ जाईल. त्यामुळे कामाचा कंटाळा येईल. शिवाय कारण नसताना चिडचिड होईल. आपण दुसऱ्यासाठी इतका वेळ दिला आणि दुसऱ्याकडून आपल्याला काहीच मिळाले नाही याचासुद्धा तुम्हाला राग येईल. बाकी दिवस उत्तम असतील. बाकी दिवसांत चंद्राचे होणारे भ्रमण अतिशय शुभदायक आहे. तुम्हाला अपेक्षा नसतानाही चांगले प्रस्ताव येतील. ते आगामी काळाचे सोने करणारे ठरतील. तेव्हा हे प्रस्ताव स्वीकारा. व्यवसायात फायदा होईल. नोकरदार वर्गाला वरिष्ठांचे सहकार्य मिळेल. आर्थिक लाभ होईल. मित्र-मैत्रिणींची करमणूक होईल. नातेवाईकांशी संवाद साधाल. एकूणच सप्ताह भाग्योदयाचा असेल. आरोग्य उत्तम राहील.

शुभ दिनांक : १३, १६

महिलांसाठी : व्यवहार पूर्ण होतील.

मिथुन : समाधानी वृत्ती राहील

दिनांक १३ रोजीचा एकच दिवस सोडला तर बाकी दिवस लाभदायक असतील. ज्या वेळी दिवस चांगले आहेत अशा वेळी मात्र ध्यानीमनी नसताना कामे वेळेत पूर्ण होत असतात. फार प्रयत्न करण्याची गरज नसते. संधी चालून येतात. त्यामुळे काम करण्याची उत्सुकता चांगली राहते. आपले मत काय आहे हे इतरांना समजावून सांगण्यात वेळ जात नाही.

अपेक्षित फलप्राप्ती होते. व्यवसायातील आवक-जावक उत्तम राहील. नोकरदार वर्गाला कामामध्ये येणारे अडथळे दूर होतील. आर्थिक बाबतीत समाधानी वृत्ती राहील. राजकीय क्षेत्रात महत्त्वाच्या गोष्टींवर चर्चा होईल. मित्र-मैत्रिणींशी संपर्क साधाल. संततीचे कौतुक कराल. तरुण वर्गाचे विवाह ठरतील.

मानसिक समाधान लाभेल.

आरोग्याच्या तक्रारी दूर होतील.

शुभ दिनांक : १४, १८

महिलांसाठी : वेळेत काम पूर्ण होईल.

कर्क : थकबाकी जमा होईल

दिनांक १४, १५ हे दोन दिवस चांगले कसे जातील ते पाहा. कारण दिवस असे असले की तुम्हाला मात्र वाद घालण्याची खुमखुमी येते. अशाने स्वत:चे नुकसान स्वत: करून घेता. आपण काय बोलतो याचे भानच ठेवायचे नाही, अशी एक प्रकारची वृत्ती निर्माण होते. दिवस चांगले आले की या सगळ्या गोष्टी विसरून जायच्या अशीच मानसिकता होते. तेव्हा या दिवसांत जितके शांत राहता येईल तितके शांत राहा. कोणाला काही बोलू नका. बाकी दिवस चांगले असतील. व्यवसायात उलाढाल वाढेल. नोकरदार वर्गाला कामात पूर्णपणे लक्ष केंद्रित करावे लागेल.

आर्थिक बाबतीत थकबाकी जमा होईल. राजकीय क्षेत्रात जबाबदारीने काम करावे लागेल. कुटुंबामध्ये दुरावा येणार नाही याची काळजी घ्या. प्रकृती जपा.

शुभ दिनांक : १६, १७

महिलांसाठी : इतरांना सल्ला देणे टाळा.

सिंह : धाडसी निर्णय टाळा

षष्ठस्थानातून अष्टमस्थानाकडे चंद्राचे भ्रमण होत आहे. हे भ्रमण म्हणजे धरलं तर चावतंय सोडलं तर पळतयं, अशी परिस्थिती निर्माण होते. काय निर्णय घ्यावे काहीच कळत नाही. एखादी गोष्ट समोरच्याला नीट जरी सांगायला गेले तरी तो लगेच अंगावर येणार, अशा वेळी तुमची मानसिकता बिघडून जाते. अशा वेळी मागचा-पुढचा न विचार करता तुम्ही निर्णय घेता. तेव्हा धाडसी निर्णय घेणे टाळा, त्याने नुकसान होऊ शकते.

व्यवसायात जे चालले आहे ते चांगले समजून पुढे चला. नवीन गुंतवणूक करू नका.

नोकरदार वर्गाने कामाकडे लक्ष द्या.

विचार करून खर्च करा.

राजकीय क्षेत्रात इतरांच्या वैयक्तिक गोष्टीत हस्तक्षेप करू नका. नातेवाईकांच्या सुखदु:खात सहभागी व्हा.

आरोग्याच्या बाबतीत निष्काळजीपणा टाळा.

शुभ दिनांक : १४, १८

महिलांसाठी : दडपण घेऊ नका.

कन्या : धीर धरा

दिनांक १४, १५, १८, १९ असे चार दिवस शुभ नाहीत. त्यामुळे या दिवसांत कोणतीही गोष्ट करायला जा, ती उलटच होते. जरी तुम्ही प्रामाणिक असला तरी समोरच्याला तुमचे काही चांगले दिसत नाही अशी परिस्थिती निर्माण होते. अशा वेळी राग येतो. आपण इतरांसाठी एवढे करायचे आणि त्यांनी आपल्याला धोका द्यायचा हे आपल्या बुद्धीला पटत नाही. त्यामुळे तुम्ही पटकन बोलून दाखवता आणि गैरसमज निर्माण होतात. अशा वेळी जरा स्पष्ट बोलणे टाळा.

धीर धरा. बाकी दिवस ठीक राहतील.

व्यवसायातील चढउतार वेळीच लक्षात घ्या. नोकरदार वर्गाने आपले मत कोणावर लादण्याचे प्रयत्न करू नका.

खर्च जपून करा.

जोडीदाराचा आदर करा.

आरोग्याची काळजी घ्या.

शुभ दिनांक : १३, १७

महिलांसाठी : कामात गुंतून राहिलेले चांगले.

तूळ : रागावर नियंत्रण ठेवा

दिनांक १६, १७ हे दोन दिवस काय करावे, काय करू नये, हे सुचणारच नाही. कारण या दिवसांत तुम्हाला काय होते हे तुम्हालाच कळत नाही. म्हणजे या दिवसांत काम वेळेत होत नाही. इतरांची मदत मिळत नाही हा राग मनामध्ये असतो आणि समोर कोण दिसेल त्यावर तो राग निघतो. अशाने नाती दुरावतात. त्यामुळे रागावर नियंत्रण ठेवा. इतरांचे मत काय आहे हे ऐकून घेण्याची मानसिकता ठेवा. नाही पटले तर सोडून द्या. बाकी दिवस चांगले असतील. व्यवसायातून जे उत्पन्न मिळते त्या उत्पन्नातून दुसरी गुंतवणूक करताना विचार करा.

नोकरदार वर्गाला कामांसाठी लागणारा वेळ जास्ती द्यावा लागेल. आर्थिक व्यवहार जपून करा. मुलांच्या वागण्या-बोलण्याकडे लक्ष द्या.

घरगुती वातावरण ठीक राहील.

योगसाधनेला महत्त्व द्या.

शुभ दिनांक : १४, १५

महिलांसाठी : तडकाफडकी निर्णय घेऊ नका.

वृश्चिक : चर्चा टाळा

दिनांक १८, १९ हे दोन दिवस असे आहेत की या दिवसांत तुमचा तोंडावर ताबा राहणार नाही. कारण ज्या गोष्टी होऊन गेलेल्या आहेत अशा गोष्टी तुम्ही वारंवार काढता, त्यावर चर्चा करता आणि वादाला कारण बनता. त्यामुळे एक गोष्ट लक्षात ठेवा, गोष्ट नवी असो किंवा जुनी- त्यावर चर्चा करणे टाळा, म्हणजे त्रास होणार नाही. बाकी दिवसांचा कालावधी चांगला असेल. या कालावधीत प्रयत्नांत कमी पडू नका. उद्याचे काम आजच करण्याची मानसिकता ठेवा. तरच कामाची गती वाढेल. व्यवसायातून अपेक्षित असे उत्पन्न मिळेल. नोकरदार वर्गाला वरिष्ठांकडून मिळालेल्या सूचनांचे पालन करावे लागेल. आर्थिक बचत करणे योग्य राहील. राजकीय क्षेत्रातील हेवेदावे दूर करा. घरामध्ये ज्येष्ठ व्यक्तींच्या प्रकृतीची काळजी घ्या स्वत:च्या आरोग्याकडे दुर्लक्ष करू नका.

शुभ दिनांक : १६, १७

महिलांसाठी : देवाणघेवाण टाळा.

धनू : कामात व्यस्त राहाल

या आठवड्यात सर्व दिवस चांगले आहेत. दिवस चांगले असले की तुम्हाला काम सुचत नाही. मनोरंजन कसे करायचे, कुठे जायचे हे नियोजन न करता ठरवता व बेफिकीरपणे वागता. एखाद्या गोष्टीचा मोह किती असावा हे वेळ गेल्यानंतर तुम्हाला कळते. चांगले दिवस असले की आपलेच घोडे दामटायचे अशी तुमची वृत्ती राहते आणि तुम्ही ते करून घेता. इतरांपेक्षा आपण वेगळे कसे आहोत हे भासवण्याचा प्रयत्न करता. याचा त्रास भविष्यात तुम्हालाच होतो.

व्यवसायात चाललेल्या घडामोडीत बदल होतील. नोकरदार वर्गाला कामातून वेळ मिळणार नाही. कामात व्यस्त राहाल.

आर्थिक लाभ होईल.

शेजाऱ्यांशी जेवढ्यास तेवढे राहा.

आरोग्य उत्तम राहील.

शुभ दिनांक : १८, १९

महिलांसाठी : ज्येष्ठांची मदत घ्या.

मकर : मनोरंजन होईल

या सप्ताहात असा कोणताच दिवस नाही की त्या दिवशी असे करा तसे करा, हा दिवस शुभ नाही अशुभ आहे असे काही नाही. सर्व दिवस चांगले आहेत. चांगल्या दिवसांमध्ये तुमची मानसिकताही चांगली राहते, पण चांगल्या कामासाठी वेळ न देता नको त्या गोष्टींकडे लक्ष देता, त्यामुळे चांगले काम बाजूला राहते. आपल्या कामाव्यतिरिक्त इतर गोष्टीत तुम्ही लक्ष देत नाहीत. मनोरंजन कसे होईल याच गोष्टीकडे तुमचे लक्ष राहते.

व्यवसायात गुंतवणूक केल्यानंतर किती फायदा होईल याचा विचार करून गुंतवणूक कराल. याचा नक्कीच फायदा होईल.

नोकरदार वर्गाला व्यवस्थापन उत्तम जमेल.

आर्थिक काटकसर करा.

समाजसेवेत सहभाग राहील.

वैवाहिक जीवन सुखाचे राहील.

कुटुंब आनंदी असेल.

आरोग्य साथ देईल.

शुभ दिनांक : १३, १४

महिलांसाठी : सहलीचे बेत आखाल.

कुंभ : योग्य दिशा मिळेल

दिनांक १३ रोजीचा एकच दिवस सोडला तर बाकी दिवस चांगले असतील. बऱ्याच दिवसांपासून रखडलेल्या कामांना हात लागत नव्हता, सध्या ही कामे पूर्ण होतील. काम उशिरा झाले तरी चालेल, पण ते चोख करायचे हा तुमचा अट्टहास असेल. आठवड्यात कोणतेच काम मागे राहणार नाही. सर्व कामे वेळेत पूर्ण होतील. याचा एक आनंद तुम्हाला असेल. कोणत्या मार्गाने काम करायचे याची योग्य दिशा मिळेल. व्यवसायातून बरेच मोठे उत्पन्न मिळेल. या मिळालेल्या उत्पन्नाचे गुंतवणुकीत रूपांतर करा. नोकरदार वर्गाला कामात येणारे तांत्रिक अडथळे सध्या तरी येणार नाहीत. आर्थिक व्यवहार जपून करा. राजकीय क्षेत्रातील घडामोडींचा आढावा घ्याल. जोडीदाराचा आदर करा. प्रकृती साथ देईल.

शुभ दिनांक : १४, १५

महिलांसाठी : संघर्ष कमी होईल.

मीन : आरोग्याची काळजी घ्या

दिनांक १४, १५ हे दोन दिवस डोकेदुखी वाढवणारे आहेत. असे दिवस असले की तुम्हाला नको त्या गोष्टी सुचतात. ज्या ठिकाणी गुंतवणूक करणे त्रासाचे असते अशा ठिकाणी तुम्हाला गुंतवणूक करावीशी वाटते. अनोळख्या व्यक्तीवर पटकन विश्वास ठेवता आणि नुकसान करून घेता. तेव्हा या दोन दिवसांत फार मोठ्या उलाढाली करू नका. इतरांच्या वैयक्तिक गोष्टीत हस्तक्षेप करणे टाळा. स्वत:च्या कामाला महत्त्व द्या. बाकी दिवस चांगले असतील. चांगल्या दिवसांमध्ये प्रयत्न वाढवा. हे प्रयत्न यशस्वी होतील व्यवसायात येणाऱ्या अडचणी दूर होतील. नोकरदार वर्गाला कामात व्यस्त राहावे लागेल. आर्थिकदृष्ट्या उधारीचे व्यवहार टाळा. राजकीय क्षेत्रात सध्या मन लागणार नाही. संततीसौख्य लाभेल. घरगुती वातावरण चांगले कसे राहील ते पाहा. जोडीदाराच्या सल्ल्याने निर्णय घ्या. आरोग्याची काळजी घ्या.

शुभ दिनांक : १६, १७

महिलांसाठी : चढउतार राहील.

gsmita332@gmail.com

● १३ ते १९ जुलै २०२५ ● डॉ. स्मिता अतुल गायकवाड