आई राजा उदोऽऽ उदोऽऽ घटस्थापनेने तुळजाभवानी देवीच्या नवरात्रोत्सवास प्रारंभ

गुरूवारी पहाटे २.३० वाजण्याच्या सुमारास नवरात्रोत्सवापूर्वीची नऊ दिवसांपासूनची देवीची मंचकी निद्रा समाप्त झाली. त्यानंतर देवीची मूर्ती सिंहासनावर प्रतिष्ठापित करण्यात आली. नित्योपचार पूजा, आरती झाल्यानंतर दुपारी १२ वाजता घटकलशाची पारंपरिक पद्धतीने पूजा करून घटकलशांची घटस्थापना देवीजींच्या गाभार्‍यात करण्यात आली. तसेच खंडोबा मंदिर, यमाईदेवी मंदिर, टोळभैरव आणि आदिमाया आदिशक्ति या मंदिरांमध्ये जिल्हाधिकारी डॉ. सचिन ओम्बासे यांच्या हस्ते विधिवत पूजा करून घटस्थापना करण्यात आली.

हेही वाचा : वीस दिवस बेशुद्ध असलेल्या चिमुकल्याला मिळाले जीवदान, वालावलकर रुग्णालयाच्या प्रयत्नांना यश

यावेळी तुळजाभवानी मंदिर संस्थानचे विश्वस्त आमदार राणाजगजितसिंह पाटील, जिल्हाधिकारी डॉ. सचिन ओम्बासे, महंत तुकोजी बुवा, महंत हमरुजी, वाकोजी बुवा, निवासी उपजिल्हाधिकारी शोभा जाधव, उपजिल्हाधिकारी स्वाती शेंडे, मंदिर संस्थानच्या तहसीलदार तथा व्यवस्थापक (प्रशासन) माया माने, पाळीकर पुजारी मंडळ, उपाध्ये मंडळ, भोपे पुजारी मंडळ, पदाधिकारी, सहायक व्यवस्थापक सिद्धेश्वर इंतुले, अमोल भोसले, विश्वास कदम उपस्थित होते.