अनुष्काने अशा प्रकारे सांगितली तिच्या आगामी सिनेमाच्या प्रदर्शनाची तारीख

अनुष्का शर्माच्या निर्मिती संस्थेअंतर्गत बनणाऱ्या ‘फिल्लौरी’ सिनेमाच्या कथेचा पहिला भाग लीक झाला आहे. मिळालेल्या माहितीनुसार, ‘फिल्लौरी’ ही अशा मुलीची कथा आहे जिचे लग्न ठरले असून तिला मंगळ आहे. त्या मुलीवर असलेल्या मंगळाचा प्रभाव दूर करण्यासाठी तिचे लग्न आधी एका झाडाशी लावून नंतर मग मुलाशी केले जाते. खरं तर ही लीक झालेली कथा सिनेमाचा अगदी छोटासा भाग असल्याचे म्हटले जातेय. चित्रपटातील या प्रसंगाद्वारे समाजातील अंधविश्वास आणि चुकीच्या पद्धतीने चालत आलेल्या रुढी परंपरा दूर करण्याचा संदेश देण्यात येणार आहे. यास फिल्मी तडका देण्यात येईल ते काही वेगळे सांगावयास नको. या सिनेमात अनुष्का शर्मा हिच्यासोबत ‘उडता पंजाब’ या सिनेमाने बॉलीवूडमध्ये पदार्पण करणारा पंजाबी अभिनेता दिलजीत दोसांज आणि सूरज शर्मा यांच्याही मुख्य भूमिका असतील.