सेवाकर चुकवल्यामुळे निर्माता समीर कर्णिकला अटक

बॉलीवूड चित्रपट निर्माता-दिग्दर्शक समीर कर्णिकला आज (शनिवारी) सेवाकर विभागाने १.१८ कोटींचा कर चुकावल्यामुळे अटक केली होती. मात्र, त्यानंतर न्यायालयाने जामीन मंजूर केल्यामुळे त्याची सुटका करण्यात आली.
सेवाकर विभागाचे उपायुक्त समीर वानखेडेंच्या नेतृत्वाअंतर्गत करण्यात आलेल्या तपासात असे आढळले की, कर्णिकने ‘यमला पगला दीवाना’ चित्रपटासाठी एका वितरण कंपनीला ११.५० कोटींची कॉपीराइट सेवा दिली होती. या व्यवहारात गोळा झालेला १.१८ कोटींचा सेवाकर कर्णिकने अधिका-यांकडे जमा केलेला नाही.
याप्रकरणी, अभिनेता सन्नी देओलही आरोपी आहे. मात्र, त्याला अटक करण्यात आलेली नाही. त्याच्या कंपनीकडून कर रुपात मागण्यात आलेल्या १.९५ कोटींपैकी त्याने ८६ लाखांचा कर जमा केल्याने त्याची अटक टळली आहे.