अखेर बसवरून गुजराती जाहिराती उतरविल्या

मनसेची खेळी यशस्वी..
मराठी-गुजराती समाजात तेढ निर्माण करणाऱ्या बसवरील जाहिरातींविरोधात मनसेने बेस्ट समितीत आवाज उठवताच बेस्ट उपक्रमाने बसवरील जाहिराती शनिवारी उतरवल्या. गुजराती मुद्दय़ावरून एकीकडे मराठी कार्ड वापरतानाच सेनेला कोंडीत पकडण्याची मनसेची दुहेरी खेळी यावेळी यशस्वी ठरली आहे.
मुंबईच्या आर्थिक व बौद्धिक विकासाचे श्रेय फक्त गुजराती समाजाला देणाऱ्या जाहिराती बेस्ट उपक्रमातील ११५ बसवर लावण्यात आल्या होत्या. याबाबत मनसेकडून शुक्रवारी बेस्ट समितीत आवाज उठवण्यात आला. मात्र बेस्ट समितीची सत्ता हाती असलेल्या शिवसेनेला याबाबत कोणतीही भूमिका मांडता आली नाही. गुजराती समाजाला ‘सामना’तील अग्रलेखातून ज्ञानामृत पाजण्याचा प्रयोग अंगलट आल्याने, नेमकी कोणती बाजू उचलावी याबाबत सेना सदस्य संभ्रमात होते. या संभ्रमाचा फायदा उचलत मनसेने पुन्हा एकदा मराठीचा मुद्दा लावून धरला. मनसेने उपस्थित केलेल्या मुद्दय़ात सत्य असले तरी तथ्य नसल्याचे बेस्ट समितीचे अध्यक्ष सांगत होते. बेस्टने जाहिराती उतरवल्या नाहीत तर मनसे त्यांच्या स्टाइलने जाहिराती उतरवेल ही मनसेने दिलेली मात्रा मात्र लागू पडली आणि याबाबत आंदोलन करून मनसेला अधिक श्रेय मिळू नये यासाठी बेस्ट बसवरील जाहिराती उतरविण्यास सुरुवात झाली.
बेस्टवरील जाहिरातींबाबत योग्य ती कारवाई केली जाईल, असे बेस्टचे महाव्यवस्थापक ओ. पी. गुप्ता यांनी आश्वासन दिले होते. त्यानुसार शनिवार सकाळपासून या जाहिराती काढण्यास सुरुवात झाली, अशी माहिती बेस्टचे जनसंपर्क अधिकारी ए. एस. तांबोळी यांनी दिले. दरम्यान संबंधित जाहिराती देणाऱ्या वृत्तपत्रानेही सर्व ठिकाणावरील जाहिराती मागे घेण्याचे पाऊल उचलल्याचे समजते.