Photos: अलका कुबल व भरत जाधव एकत्र येणार प्रेक्षकांच्या भेटीस, पाहायला मिळणार ‘या’ महत्त्वाच्या भूमिकेत

सध्या मराठी वाहिन्यांमध्ये जोरदार स्पर्धा सुरू असल्याचं चित्र पाहायला मिळत आहे. टीआरपीसाठी सुरू असलेल्या या स्पर्धेत वाहिन्या गेल्या काही दिवसांपासून नवनवीन मालिकांच्या घोषणा करत आहेत. 'स्टार प्रवाह', 'झी मराठी, 'कलर्स मराठी' या वाहिन्या नव्या मालिका प्रेक्षकांच्या भेटीस घेऊन येत आहेत. त्यामुळे सध्या नवनवीन मालिका येण्याचं सत्र सुरू आहे, असं म्हणायला काही हरकत आहे. चार दशकं सिनेसृष्टीवर अधिराज्य गाजवणाऱ्या अलका कुबल-आठल्ये आणि महाराष्ट्राचे विनोदाचे बादशहा, अत्यंत संवेदनशील गुणी अभिनेते भरत जाधव हे लवकरच एकत्र पाहायला मिळणार आहेत. अलका कुबल-आठल्ये आणि भरत जाधव एका महत्त्वाच्या भूमिकेत झळकणार आहेत. ‘कलर्स मराठी’ वाहिनीवर नवाकोरा विनोदी कार्यक्रम सुरू होतं आहे. ‘हसताय ना? हसायलाच पाहिजे!’, असं या कार्यक्रमाचं नाव आहे. ‘हसताय ना? हसायलाच पाहिजे!’ या कार्यक्रमाची लेखन, दिग्दर्शन, सूत्रसंचालन अशी संपूर्ण धुरा डॉ. निलेश साबळे स्वतः सांभाळणार आहेत. या कार्यक्रमात भाऊ कदम व ओंकार भोजने व्यतिरिक्त सुपर्णा श्याम, स्नेहल शिदम आणि रोहित चव्हाण असे अनेक कलाकार झळकणार आहेत. ‘हसताय ना? हसायलाच पाहिजे!’ याच कार्यक्रमात अलका कुबल-आठल्ये व भरत जाधव यांच्याकडे महत्त्वाची जबाबदारी असणार आहे. अलका कुबल-आठल्ये व भरत जाधव हे दोन महान कलाकार दर भागामधे सेलिब्रिटी पाहुणे म्हणून ‘हसताय ना? हसायलाच पाहिजे!’ या कार्यक्रमाला दाद देण्यासाठी लाभणार आहेत. ‘हसताय ना? हसायलाच पाहिजे!’ हा कार्यक्रम २० एप्रिलपासून शनिवार – रविवार रात्री नऊ वाजता पाहायला मिळणार आहे. (All Photos-Social Media/ LS Graphic Design)