कल्याण – कल्याण, डोंबिवली शहरातील दोन वेगळ्या घटनांमध्ये दोन तरुणांनी शुक्रवारी आत्महत्या केल्या. डोंबिवलीतील एका प्रकरणात तरुणाला मैत्रिणीने भेटण्यास नकार दिला म्हणून नैराश्य आल्याने तरुणाने मैत्रिणीच्या राहत्या घराच्या चौथ्या माळ्यावरून उडी मारून आत्महत्या केली. तर, कल्याणमधील ११ वर्षाच्या तरुणाने आपले प्रेमप्रकरण उघड झाल्याने आलेल्या तणावातून आत्महत्या केली.
डोंबिवलीतील मानपाडा, कोळसेवाडी पोलीस ठाण्यात या दोन्ही प्रकरणांच्या नोंदी आहेत. कोल्हापूर जिल्ह्यातील पन्हाळा तालुक्यातील एक तरुण स्वप्निल अनिल धुमाळ (२३) हा डोंबिवलीत आपल्या मैत्रिणीला भेटण्यासाठी आला होता. परंतु, मैत्रिणीने त्याला भेटण्यास नकार दिला. यामधून त्याला नैराश्य आले. या नैराश्यातून त्याने मैत्रिणीच्या राहत्या घराच्या चौथ्या माळ्यावरील गच्चीवर जाऊन जमिनीवर उडी मारून आत्महत्या केली. या तरुणाला तातडीने पालिकेच्या शास्त्रीनगर रुग्णालयात उपचारासाठी नेले. तेथे उपचार सुरू असताना त्याचा शुक्रवारी मृत्यू झाला. मानपाडा पोलीस ठाण्याचे हवालदार एस. के. आढाव यांच्या तक्रारीवरून या मृत्यूप्रकरणाची नोंद करण्यात आली आहे.
कल्याण पूर्वेतील कोळसेवाडी भागात राहत असलेल्या एका ११ वर्षांच्या मुलाने शुक्रवारी आई, वडील घरात नाहीत पाहून टिटवाळा येथील एका अल्पवयीन मुलीला घरी आणले होते. बाहेर गेलेले आई, वडील अचानक घरी आले. त्यावेळी घरात मुलगा आणि त्याची मैत्रिण होती. पालकांनी अल्पवयीन मुलाला मुलीची माहिती विचारली. ती घरी का आली होती असे प्रश्न केले. त्यानंतर पालकांनी त्या मुलीला घेऊन तिला टिटवाळा येथे तिच्या घरी सोडण्यास गेले. यावेळी अल्पवयीन मुलगा घरात एकटाच होता. आई, वडील परतल्यावर आपल्याला ओरडतील या भीतीने अल्पवयीन मुलाने राहत्या घरात गळफास घेऊन आत्महत्या केली. कोळसेवाडी पोलीस ठाण्यात याप्रकरणाची नोंद करण्यात आली आहे.
© The Indian Express (P) Ltd