ब्रिजभूषण सिंहांच्या मुलाच्या ताफ्यातील वाहनाची दुचाकीला धडक, दोघांचा मृत्यू; तरुणांकडून चक्काजाम!

उत्तर प्रदेशातील गोंडा येथे भाजपचे कैसरगंज लोकसभा उमेदवार करण भूषण सिंह यांच्या ताफ्यातील भरधाव वेगाने येणाऱ्या वाहनाचा अपघात झाला. गोंडा येथील कर्नलगंज-हुजूरपूर रस्त्यावरील बैकुंठ पदवी महाविद्यालयाजवळ हा अपघात झाला.

या प्रकरणी गुन्हा दाखल करण्यात आला असून चंदा बेगम यांनी त्यांच्या तक्रारीत म्हटलं आहे की, आज सकाळी ९ वाजण्याच्या सुमारास तिचा १७ वर्षांचा मुलगा रेहान आणि २४ वर्षांचा पुतण्या शहजादे हे दोघे दुचाकीवरून निघाले असताना विरुद्ध बाजूने येणाऱ्या फॉर्च्युनरने दोघांना धडक दिली. दोघांना तात्काळ रुग्णालयात नेण्यात आले. परंतु, त्यांना मृत घोषित करण्यात आले आणि आणखी एकजण जखमी झाला असून त्याला रुग्णालयात उपाचारार्थ दाखल करण्यात आले आहे.

पोलिसांनी कार जप्त केली असून चालकाला अटक केली आहे. करण भूषण सिंह या ताफ्यातून प्रवास करत होते की नाही याबाबत अद्याप कोणतीही पुष्टी झालेली नाही. करण भूषण सिंह हे कैसरगंज लोकसभा मतदारसंघातून भाजपचे उमेदवार आहेत. ब्रिज भूषण यांच्यावर महिला कुस्तीपटूंचा लैंगिक छळ केल्याप्रकरणी फौजदारी आरोप असल्याने त्यांनी त्यांचे वडील आणि विद्यमान खासदार ब्रिजभूषण शरण सिंह यांची जागा घेतली.

याप्रकरणी मृतदेह शवविच्छेदनासाठी पाठवण्यात आले आहेत. तर, या घटनेतर गावात तणाव निर्माण झाला आहे. पोलिसांनी याप्रकरणी चौकशी सुरू केली असून पोलिसांविरोधात ग्रामस्थांनी घोषणाबाजी केली. तरुणांकडून चक्काजाम करण्यात आला असून पोस्टर्माटम रोखताना पोलीस आणि जमावात बाचाबाची झाली.