Gautam Gambhir Secret: कोलकाता नाईट रायडर्सच्या गोलंदाजीचा माजी मुख्य प्रशिक्षक वसीम अक्रम यांनी स्पोर्ट्सकीडाच्या ‘मॅच की बात’ या कार्यक्रमात गौतम गंभीरचं एक टॉप सिक्रेट उघड केलं आहे . गौतम गंभीरचा हा एक हट्ट पुरवण्यासाठी कोलकाता नाईट रायडर्सला (KKR) अनेकदा अडचणींचा सामना करावा लागला आहे असेही अक्रमने म्हटले आहे. गौतम गंभीरने २०११ ते २०१७ दरम्यान कोलकाता नाईट रायडर्सचे नेतृत्व केले होते. माजी भारतीय सलामीवीराच्या नेतृत्वाखाली केकेआर संघाने २०१२ आणि २०१४ मध्ये दोनदा आयपीएल चॅम्पियन पद मिळवले होते. तर, वसीम अक्रम २०१० मध्ये केकेआर कोचिंग स्टाफमध्ये सामील झाला होता व २०१६ पर्यंत त्याने संघासह काम केले होते. यादरम्यानचीच एक आठवण त्याने मॅच की बात कार्यक्रमात शेअर केली आहे.
वसीम अक्रमने सांगितले की, “गौतम गंभीरला अंकशास्त्रावर खूप विश्वास आहे. त्यामुळे, राहत्या हॉटेलच्या रुम नंबरमध्ये नऊ अंक असावा यासाठी गंभीर नेहमी आग्रह धरायचा. त्याची सध्या लोकांच्या मनातील प्रतिमा वेगळी आहे पण गौतम गंभीर हा साधा, सरळ माणूस आहे. समजून घ्यायला सोपा आहे, त्याचा सेन्स ऑफ ह्यूमर चांगला आहे. तो खूप शांत व खूप सरळ विचारांचा आहे. हे सगळं खरं असलं तरी त्याच्या नऊ क्रमांकाच्या खोलीच्या आग्रहामुळे दौऱ्यांच्या वेळी त्याच्यासाठी खोली शोधताना खूप अडचणी यायच्या. त्याला ९, ४५ किंवा ३६ अशा नऊ क्रमांक असलेल्याच खोलीत राहायचे असायचे. आता त्याचं कारण काय हे रहस्यच आहे.”
अक्रम असेही म्हणाला की, “मी गौतमबरोबर बराच वेळ घालवला आहे. आशिया चषकाच्या पॅनलमध्येही आम्ही एकत्र होतो. मला गौतमबद्दल एक गोष्ट आवडते ती म्हणजे तो एक नेता, कर्णधार म्हणून उत्तम आहे. नेहमी आघाडीवर राहून लढतो.” गौतम गंभीरने यापूर्वी २०२२ आणि २०२३ मध्ये लखनौ सुपर जायंट्स (LSG) चा मार्गदर्शक म्हणून काम केलं होतं.
हे ही वाचा<< ऋतुराज व दुबेची तुफान फलंदाजी चालू असताना धोनी का चिडला? कॅमेरा बघितला, बॉटल उचलली आणि.. पाहा Video
सध्याची केकेआरची स्थिती पाहिल्यास श्रेयस आतापर्यंत त्यांनी सातपैकी पाच सामने जिंकले आहेत. गेल्या दोन हंगामात अपयशी ठरल्यावर आता यंदा अय्यरच्या नेतृत्वाखालील संघ सध्या आयपीएल पॉईंटटेबलमध्ये दुसऱ्या स्थानावर असल्याने प्ले ऑफ मध्ये पोहोचण्याची शक्यता आहे. केकेआरचा पुढील सामना ईडन गार्डन्समध्ये शुक्रवारी २६ एप्रिलला पंजाब किंग्सविरुद्ध होणार आहे.