रिझर्व्ह बँक ऑफ इंडिया (RBI) ने आज सोलापुरातील लक्ष्मी को-ऑपरेटिव्ह बँक लिमिटेडचा परवाना रद्द केला आहे. बॅंकेकडे पुरेसे भांडवल नसून बॅंकेकडून नियांचे पालन होत नसल्याचे कारण आरबीआयकडून देण्यात आले आहे.
आरबीआयने एक निवेदन जारी करत म्हटले, “सोलापूर येथील लक्ष्मी को-ऑपरेटिव्ह बँक लिमिटेडला आर्थिक व्यवहार करण्यास मनाई करण्यात आली आहे. बँकिंग रेग्युलेशन अॅक्ट, 1949 च्या कलम ५६ अंतर्गत ही कारवाई करण्यात आली आहे. आरबीआयने सहकार आयुक्त आणि सहकारी संस्था निबंधक यांना बँक बंद करण्याचा आदेश दिले आहेत. तसेच बँकेसाठी लिक्विडेटर नियुक्त करण्यासही सांगितले आहे.
बँकेकडे पुरेसे भांडवल नसून ठेवीदारांचे पैसे परत करण्यास बॅंक सक्षम नाही. सध्या बॅंकेची आर्थिक स्थिती अत्यंत वाईट आहे. बँकेला आर्थिक व्यवहार सुरू ठेवण्याची परवानगी दिल्यास, ठेवीदारांचे नुकसान होईल, असे आरबीआय कडून स्पष्ट करण्यात आले आहे.