‘बिग बॉस मराठी ४’ मधून प्रसिद्धीझोतात आलेला अभिनेता प्रसाद जवादे आणि अभिनेत्री अमृता देशमुखचा विवाहसोहळा आज १८ नोव्हेंबर रोजी पार पडणार आहे. नुकताच त्यांचा हळदी आणि संगीत समारंभ पार पडला. या सोहळ्याचे फोटो सोशल मीडियावर व्हायरल झाले आहेत.
अमृता आणि प्रसादच्या संगीत समारंभात अनेक कलाकारांनी हजेरी लावली होती. नुसतीच हजेरी नाही, अनेकांनी त्यांच्या संगीत कार्यक्रमात भन्नाट डान्सही केला. या कार्यक्रमात सगळ्यांचं लक्ष वेधलं ते अमृताच्या वडिलांनी. प्रसाद आणि अमृताच्या संगीत कार्यक्रमात अमृताच्या वडिलांनी मुलीसाठी एक खास कविता सादर केली. ही कविता ऐकून सगळेच भावुक झाले होते.
अमृताच्या वडिलांची कविता
गुंतले होते जीव असे की डोळ्यात दिसत होतं यांना सर्वकाही,
प्रीतीचा बहर फुलला असा काही त्या गंधाची चढली होती नशाही,
आपण दोघं केवळ दोघं दुसरं कुणीही नाही,
हे भल्या माणसा एक जरा मी सांगतो गुपित तुला,
मी तिला आणि तिने मला रे पहिला वहिला श्वास दिला,
सांगेल तुला ती अर्थ जगाचाआधी तिने माझ्यातच पाहिला,
मी कसा विसरू सांग? मी कसा विसरू सांग
त्या तिच्या शांत श्वासांना, झोपेतल्या मिश्किल हसण्याला,
दुधाचा वास जेव्हा आला तिच्या नाजूक साजूक ओठांना
मी कसा विसरू सांग? मी कसा विसरू सांग
कुशीतल्या त्या क्षणांना, तिच्या माझ्या मिठीला,
हृदयातून गलबलताना घेतलेल्या चिमुकल्या मुक्याला,
आणि इवल्या इवल्या बोटांनी बोट माझं धरायला,
बोबड्या बोबड्या बोलांनी बाबा म्हणून हसण्याला,
आठवतंय अजूनही, ओढलेली मिशी, तुटलेला चष्मा आणि फेकलेलं पेन
ओळखीची चाहूल मारलेली, मारलेली मुसळी आणि तुटलेली चैन,
कळतंय रे बापाच्या अंत नसतो भावनेला,
पण प्रश्न मनात आला तुझ्यासोबत पाहून या राणीला,
हेच का ते उनाड बछडं, रात्री गोष्टीसाठी हटणारं,
डोळ्यात जीव आणून परिकथेत रमणारं,
उठली कळ आणि एक उसासा, महिमा काळाचा हा असा,
असो आता सांभाळ या मुलीला, माझ्या लाडक्या जीवाला
अरे असेल जर ही जगरहाटी तर काळही बदलेल कधी कुशीला
नसेनही मी सोबतीला, नसेल अडसर तुला
पण स्मरशील मला तिच्या पहिल्या प्रेमाला,
मी तिच्यावर पहिलं प्रेम केलं होतं,
मी तिच्यावर पहिलं प्रेम केलं होतं.
‘बिग बॉस’ मराठीच्या चौथ्या पर्वापासून अमृता आणि प्रसादच्या मैत्रीला सुरुवात झाली. पुढे त्यांच्या मैत्रीचे रुपांतर प्रेमात झाले. आता लवकरच ते लग्नबंधनात अडकून नव्या आयुष्याची सुरुवात करणार आहेत.