‘भाभीजी घर पर है’ मालिकेतील कलाकार खूप लोकप्रिय आहेत. लोकांना खळखळून हसवणाऱ्या या मालिकेतील एका अभिनेत्याने धक्कादायक खुलासा केला आहे. १३ व्या वर्षी आपल्यासोबत लैंगिक छळ झाला होता, असं त्याने सांगितलं आहे. या अभिनेत्याचं नाव सानंद वर्मा आहे. मालिकेत सानंद ‘अनोखे लाल सक्सेना’ हे पात्र साकारतो.
‘टाईम्स नाऊ’ला दिलेल्या मुलाखतीत सानंदने खुलासा केला की लहानपणी तो क्रिकेट खेळायला जायचा तिथे एका तरुणाने त्याचा लैंगिक छळ केला होता. ही आयुष्यातील एक वाईट आठवण आहे जी कधीच विसरू शकत नाही, असंही तो म्हणाला. “क्रिकेट सामन्यादरम्यान माझ्याबरोबर हे घडलं. मी १३ वर्षांचा होतो आणि मला क्रिकेटपटू व्हायचं होतं. मी पाटण्यातील क्रिकेट अकादमीत जायचो. तिथे एक मुलगा होता जो माझं लैंगिक शोषण करायचा. त्यामुळे मी खूप घाबरलो आणि तिथून पळून गेलो. तेव्हापासून मी क्रिकेटपासून दूर राहतो,” असं सानंद म्हणाला.
“लहानपणी माझ्यासोबत जे काही घडलं ते वाईट आहे. ही एक भयंकर आठवण आहे, जी मी विसरू शकत नाही. याआधी माझ्यासह अनेक वाईट गोष्टी घडल्या आहेत. त्यामुळे जेव्हा एखादी व्यक्ती इतका त्रास सहन करते तेव्हा तिच्यासाठी लहान गोष्टींमुळे होणारा त्रास महत्त्वाचा नसतो,” असं सानंद म्हणाला.
सानंदच्या कामाबद्दल बोलायचं झाल्यास तो जवळजवळ १० वर्षांपासून अभिनयक्षेत्रात सक्रिय आहे. त्याने मालिकांसह चित्रपटांमध्येही काम केलं आहे. तो ‘सीआयडी’, ‘लापतागंज’, ‘गुपचूप’ यांसारख्या मालिकांमध्ये काम केले आहे. याशिवाय तो ‘रेड’, ‘मर्दानी’, ‘बबली बाउंसर’, ‘छिछोरे’ आणि ‘मिशन रानीगंज’ यांसारख्या चित्रपटांचा भाग राहिला आहे.