१०८ क्रमांकाच्या रुग्णवाहिकेत आजपर्यंत अडीच हजारहून अधिक बाळांचा जन्म

आर्थिकदृष्टया दुर्बल घटक आरोग्य सेवेपासून वंचित राहू नये यासाठी आरोग्य विभाग वेगवेगळ्या योजनांच्या माध्यमातून जास्तीतजास्त रुग्णांपर्यंत आरोग्य सेवा पोहचविण्यासाठी प्रयत्न करत आहे. या अंतर्गत २०१४ मध्ये १०८ क्र मांक रुग्णवाहिका ही संकल्पना मांडण्यात आली. जिल्ह्य़ात ४६ रुग्णवाहिकांच्या माध्यमातून सर्व तालुक्यांमध्ये रुग्णांना रुग्णालयापर्यंत पोहचविण्यात येत आहे. अपघात, प्रसूतीपूर्व, प्रसूतीकाळ, प्रसूतीपश्चात, हृदयरोग, जळीत, आपत्ती अशा वेगवेगळ्या कारणांसाठी ही सेवा दिली जात आहे.

करोना काळात या सेवेच्या माध्यमातून करोनाग्रस्त रुग्णांची ने-आण मोठय़ा प्रमाणावर झाली. करोना लाटेत आतापर्यंत २१,८३६ रुग्णांनी या सेवेचा लाभ घेतल्याची माहिती रुग्णवाहिके चे विभागीय व्यवस्थापक डॉ. अश्विन राघमवार यांनी दिली.

रस्त्यांवरील वाहन अपघातात ३०,६८७ रुग्ण, जळीत एक हजार २१८, हृदयविकाराचा झटका आलेले ६०२, उंचावरून पडल्यामुळे ५५८७, विषबाधेसाठी ९३०४ तसेच प्रसुती काळात महिलांनी या सेवेचा सर्वाधिक लाभ घेतला.

ही संख्या ७९,३२४ पर्यंत पोहचली आहे. विजेचा धक्का तसेच आकाशातील वीज कोसळल्याने २८२, मोठय़ा प्रमाणावरील अपघातात एक हजार २१९, वैद्यकीय ८७,१७६ आणि इतर काही कारणांमुळे २७,७४१, हाडांची दुखापत ३७६, आत्महत्या तसेच आत्महत्येचा प्रयत्न २१८ रुग्णांना या रुग्णवाहिकेद्वारे आरोग्य सेवा दिली गेली. प्रसूती काळात या सेवेचा लाभ गरोदर मातांकडून घेतला जातो. करोनामुळे वाहतुकीवर निर्बंध असताना तसेच दुर्गम भागात वाहतुकीचा प्रश्न कायम असताना ही सेवा महिलांसाठी फायदेशीर ठरली. पेठ, हरसूल, त्र्यंबक, सुरगाण्यासह अन्य तालुक्यातून या सेवेचा लाभ घेत असताना दोन हजार ७३१ महिलांनी रुग्णवाहिके तच बाळांना जन्म दिला. दुसरीकडे व्हेंटिलेटरच्या सहाय्याने २१४ रुग्ण रुग्णालयांपर्यंत व्यवस्थित पोहचविण्यात आले.

१०८ क्र मांकाच्या रुग्णवाहिके ला मिळणारा प्रतिसाद पाहता जास्तीतजास्त रुग्णांपर्यंत ही सेवा पोहचावी यासाठी आरोग्य विभाग प्रयत्न करत आहे.