काही वर्षांपूर्वी वडिलांच्या पानटपरीवर करायचा काम, आता कमावतो कोट्यवधी; ‘अशी’ आहे शिव ठाकरेची स्ट्रगल स्टोरी

शिव ठाकरे सध्या ‘खतरों के खिलाडी’मुळे चांगलाच चर्चेत आहे. ‘बिग बॉस'मुळे शिव ठाकरे प्रसिद्धीझोतात आला. पण त्याचा हा प्रवास सोपा नव्हता. शिव ठाकरे मूळचा अमरावतीचा. त्यांच्या घरची परिस्थिती बेताची होती. शिव ठाकरेच्या वडिलांची पानटपरी होती. तिथे शिव त्यांना मदत करायचा. काम केल्यानंतर वडील त्याला बाहेर खाण्यासाठी ५ रुपये द्यायचे, पण त्याला २० रुपये लागायचे. तेव्हा शिव ते १५ रुपये स्वतः मेहनत करून कमवायचा. यानंतर काही वर्षांनी शिवने डान्स क्लासेस घेण्यास सुरुवात केली. याचदरम्यान शिवने फिटनेसकडेही लक्ष दिलं आणि नंतर तो रोडीजमध्ये सहभागी झाला. रोडीजनंतर शिव मराठी 'बिग बॉस' मराठीच्या दुसऱ्या पर्वामध्ये सहभागी झाला. शिव ठाकरेने या पर्वाच्या ट्रॉफीवर त्याचं नाव कोरलं. 'बिग बॉस' मराठीमध्ये सहभागी होऊन त्याने स्वतःची ओळख निर्माण केली. यानंतर तो 'बिग बॉस' हिंदीच्या १६व्या पर्वात झळकला. या कार्यक्रमामुळे त्याची लोकप्रियता प्रचंड वाढली. आता देशभरातील लोक त्याला ओळखतात. हे पर्व संपल्यावर शिवने पहिल्यांदाच स्वतःची नवीन आलिशान गाडी खरेदी केली. आता तो 'खतरों के खिलाडी १३'मध्ये सहभागी होणार आहे. य कार्यक्रमाच्या एका एपिसोडसाठी तो ८ लाख रुपये मानधन घेणार असल्याचं समोर आलं आहे.