माधुरी दीक्षितचे पती आहेत डॉक्टर, तर सासू- सासऱ्यांचं शिक्षण किती? डॉ. नेनेंच्या व्हिडीओमध्ये केला खुलासा

बॉलीवूडची धकधक गर्ल माधुरी दीक्षितने १७ ऑक्टोबर १९९९ मध्ये डॉ. श्रीराम नेने यांच्याशी लग्न केलं. लग्नानंतर काही काळ माधुरीने इंडस्ट्रीमधून ब्रेक घेतला होता. पुढे, काही वर्षांत नेने कुटुंबीय अमेरिकेहून भारतात परतले आणि माधुरीने बॉलीवूडमध्ये पुनरागमन केलं. अभिनेत्रीचे पती डॉ. नेने सोशल मीडियावर अनेक कौटुंबिक फोटो शेअर करत असतात. नुकतीच त्यांनी आपल्या युट्यूब चॅनेलला आई-बाबांची मुलाखत घेतली. यावेळी त्यांचे वडील माधव नेने व आई अनु नेने यांनी आपल्या शैक्षणिक प्रवासाबद्दल सांगितलं. माधुरी दीक्षितचे सासरे म्हणाले, “मी १९६३ ला इंग्लंडला गेलो त्याआधी आम्ही दादरला शिवाजी पार्क परिसरात राहायचो. माझं मॅट्रिकपर्यंतचं शिक्षण दादरच्या छबीलदास शाळेत पूर्ण झालं." तिच्या सासऱ्यांनी मुंबईच्या एल्फिन्स्टन महाविद्यालयात शिक्षण घेतल्यावर पुढे त्यांनी अभियांत्रिकी पदवीसाठी पुणे इंजिनियरिंग कॉलेजमध्ये प्रवेश घेतला होता. १९६० मध्ये शिक्षण पूर्ण झाल्यावर पुढचं एक वर्ष त्यांनी टाऊन प्लॅनिंग विभागात नोकरी केली. माधव नेने यांचं पदवीपर्यंतचं शिक्षण स्थापत्य अभियांत्रिकी विभागात (civil engineering) पूर्ण झालं आहे. हळुहळू त्यांना परदेशातील शिक्षणाचं महत्त्व समजलं. १९६३ ते १९६५ या कालावधीमध्ये त्यांनी इंग्लंडमध्ये शिक्षण पूर्ण केलं. १९६० नंतर पुढे तीन वर्षे नोकरी करून त्यांनी पैसे जमावले आणि इंग्लंड येथील इम्पेरियल महाविद्यालयात शैक्षणिक प्रवेशासाठी अर्ज केला. इंग्लंडमध्ये १९६५ मध्ये शिक्षण पूर्ण झाल्यावर ते फक्त एकदाच लग्नासाठी भारतात आले. पुढे लग्न झाल्यावर पत्नीसह ते अमेरिकेत राहू लागले. याशिवाय माधुरीच्या सासूबाईंबद्दल सांगायचं झालं, तर त्यांचं नाव अनु नेने असं आहे. सासूबाई आणि माधुरीमध्ये अतिशय सुंदर नातं असल्याचं त्या दोघींचे सोशल मीडियावरील फोटो पाहून लक्षात येतं. माधुरीच्या सासूबाई अनू नेने शॉर्ट हेअर लूकमध्ये फारच डॅशिंग आणि रुबाबदार दिसतात. त्या शिक्षणाबद्दल सांगतात, "मी उच्चशिक्षित व्हावं ही माझ्या वडिलांची अनेक वर्षांपासूनची इच्छा होती." "बीएससीमध्ये पदवी शिक्षण पूर्ण झाल्यावर पुढे मी Law स्कूलमध्ये प्रवेश घेतला. ते पूर्ण झाल्यावर मी LTMG हॉस्पिटलला मेडिकल टेक्नोलॉजी करायला जायचे." असं माधुरीच्या सासूबाईंनी डॉ. नेनेंच्या व्हिडीओमध्ये सांगितलं. ‘पंचक’च्या निमित्ताने माधुरी दीक्षितच्या सासरचं संपूर्ण कुटुंब एकत्र पाहायला मिळालं होतं. दरम्यान, माधुरीसह नेने कुटुंबीयांचं सोशल मीडियावर नेहमीच कौतुक केलं जातं. (सर्व फोटो सौजन्य : डॉ. श्रीराम नेने इन्स्टाग्राम )