अंकिता वालावलकरच्या साखरपुड्याची अंगठी पाहिलीत का? हटके ‘Ring Platter’ने वेधलं लक्ष, कोकणी संस्कृतीची दिसली खास झलक

'कोकण हार्टेड गर्ल' अंकिता वालावलकर लवकरच प्रसिद्ध मराठी संगीत दिग्दर्शक कुणाल भगतशी लग्नगाठ बांधणार आहे. अंकिता व कुणाल यांचा साखरपुडा नुकताच पार पडला. अंकिताने साखरपुड्याचे फोटो सोशल मीडियावर शेअर केले आहेत. यामध्ये तिने हिरव्या रंगाची सुंदर अशी साडी नेसून पारंपरिक लूक केल्याचं पाहायला मिळत आहे. "देवाला माहित होतं की, माझ्या हृदयाला तुझी गरज आहे. आता आयुष्यभरासाठी एकत्र होऊयात..." असं कॅप्शन देत अंकिताने साखरपुड्याचे फोटो सोशल मीडियावर शेअर केले आहेत. साखरपुडा सोहळ्यात कुणालने देखील मराठमोळा लूक केल्याचं पाहायला मिळालं. यात सर्वाधिक लक्ष अंकिताच्या साखरपुड्यातील 'Ring Platter'ने वेधून घेतलं. अंकिता व कुणालच्या साखरपुड्यात कोकणी थीम पाहायला मिळाली. हापूस आंबे, नारळाचं झाड, समुद्रकिनारा, मासे, बोट यांची प्रतिकृती असलेल्या 'Ring Platter'वर या जोडप्याच्या साखरपुड्याच्या अंगठ्या सजवून ठेवल्या होत्या. हे 'Ring Platter' सर्वांच्या पसंतीस उतरलं आहे. यामध्ये अंकिता व कुणाल यांच्या साखरपुड्याच्या अंगठ्यांची झलक पाहायला मिळत आहे. दरम्यान, अंकिता व कुणालच्या लग्नासाठी अनेक सोशल मीडिया इन्फ्लुएन्सर्स व सेलिब्रिटी कोकणात पोहोचले आहेत. ( सर्व फोटो सौजन्य : clickography व अंकिता वालावलकर इन्स्टाग्राम. Ring Platter by tejal_palyekar )