फोटोतील ‘या’ चिमुकलीला ओळखलंत का? ‘झी मराठी’च्या लोकप्रिय मालिकेत करतेय काम; सासूबाई आहेत प्रसिद्ध अभिनेत्री…

आजच्या काळात सोशल मीडियाच्या माध्यमातून कलाकार आपल्या चाहत्यांच्या संपर्कात राहतात. मालिकाविश्वात काम करणाऱ्या कलाकारांचा चाहतावर्ग मोठ्या प्रमाणात असतो. सध्या अशाच एका प्रसिद्ध अभिनेत्रीने शेअर केलेले बालपणीचे फोटो सर्वत्र चर्चेत आले आहेत. 'झी मराठी'च्या लोकप्रिय मालिकेत प्रमुख भूमिका साकारणाऱ्या अभिनेत्रीने आपल्या आईच्या वाढदिवसानिमित्त खास पोस्ट शेअर केली होती. आईला वाढदिवसाच्या शुभेच्छा देताना या लोकप्रिय अभिनेत्रीने काही जुने फोटो शेअर केले. ही अभिनेत्री दुसरी-तिसरी कोणीही नसून 'तुला शिकवीन चांगलाच धडा' फेम अभिनेत्री शिवानी रांगोळे आहे. गेली अनेक वर्षे छोट्या पडद्यावरील विविध मालिकांमधून शिवानी प्रेक्षकांच्या भेटीला येत आहे. 'बन मस्का', 'सांग तू आहेस का?', 'शेजारी शेजारी पक्के शेजारी', 'डॉ. बाबासाहेब आंबेडकर', 'आम्ही दोघी' अशा अनेक गाजलेल्या मालिकांमध्ये शिवानीने महत्त्वपूर्ण भूमिका साकारल्या आहेत. वैयक्तिक आयुष्यात शिवानीने अभिनेता विराजस कुलकर्णीशी लग्नगाठ बांधली आहे. तर, शिवानीच्या सासूबाई मृणाल कुलकर्णींना सिनेविश्वातील दिग्गज अभिनेत्री म्हणून ओळखलं जातं. या सासू-सुनेचं बॉण्डिंग सोशल मीडियावर कायम चर्चेत असतं. ( सर्व फोटो सौजन्य : शिवानी रांगोळे इन्स्टाग्राम )