पुणे : पुणे-सोलापूर रस्त्यावरील लोणी काळभोर भागात फर्निचर गोदामात गुरुवारी सकाळी आग लागली. सुदैवाने या घटनेत जीवितहानी झाली नाही. अग्निशमन दलाच्या जवानांनी पाण्याचा मारा करुन आग आटोक्यात आणली. लोणी काळभोर भागात बोरकर वस्ती सुरक्षा डोअर गोदाम आहे. गोदामात लाकडी सामान ठेवण्यात आले आहे. गुरुवारी पहाटे साडेपाचच्या सुमारास गोदामात आग लागली. आग लागल्याची माहिती मिळताच अग्निशमन दलाचे तीन बंब घटनास्थळी दाखल झाले. लाकडी साहित्य पेटल्याने मोठ्या प्रमाणावर धूर झाला होता. जवानांनी पाण्याचा मारा करून अर्ध्या तासात आग आटोक्यात आणली. गोदामाची जवानांनी पाहणी केली. गोदामात कोणी नसल्याची खात्री जवानांनी केली.
लोणी काळभोर, हडपसर-सासवड रस्त्यावर ऊरळी देवाची परिसरात अनेक कंपन्यांची गोदामे आहेत. गोदामात आग लागल्याच्या घटना या भागात सातत्याने घडतात. दरम्यान, खडकमाळ आळीत क्रीडा चषक निर्मिती करणाऱ्या कारखान्यात बुधवारी रात्री आग लागली. रस्ते खोदाईमुळे अग्निशमन दलाचे बंब घटनास्थळी पोहचण्यास विलंब झाला. जवानांनी पाण्याचा मारा करून अर्ध्या तासात आग आटोक्यात आणली.
हेही वाचा… पिंपरी- चिंचवड औद्योगिक नगरीत बंद कंपनी फोडणाऱ्या टोळीचा पर्दाफाश; २४ लाखांचं तांबं जप्त
हेही वाचा… पुणे लोकसभा पोटनिवडणुकीसाठी भाजप, काँग्रेससह मनसेही रिंगणात
खडकमाळ आळी परिसरातील भाजी मंडईजवळ क्रीडा चषक निर्मिती कारखाना आहे. बुधवारी रात्री पावणेनऊच्या सुमारास कारखान्यात आग लागली. आग लागल्याची माहिती मिळताच अग्निशमन दलाचे बंब घटनास्थळी दाखल झाले. भाजी मंडईकडे जाणारे रस्ते अरुंद असून तेथे खोदाई सुरू असल्याने अग्निशमन दलाचे बंब घटनास्थळी पोहचण्यास विलंब झाला. स्वारगेट पोलीस वसाहत परिसरातील रस्त्याने बंब घटनास्थळी पोहोचले. अग्निशमन अधिकारी प्रशांत गायकर, सुनील नाईकनवरे यांच्या मार्गदर्शनाखाली जवानांनी पाण्याचा मारा करून अर्धा तासात आग आटोक्यात आणली.