‘गो-ग्रीन’ सवलतीचा वार्षिक फायदा ६ कोटी! ‘महावितरण’च्या आकडेवारीतून बाब स्पष्ट; ग्राहकांना योजनेत सहभागी होण्याचे आवाहन

‘गो-ग्रीन’ ही वीजग्राहकांना पर्यावरणस्नेही होण्यासाठी प्रोत्साहन देणारी ऐच्छिक योजना आहे. पर्यावरणाचा ऱ्हास कमी व्हावा या उद्देशाने ‘महावितरण’कडून ही योजना २०१३ मध्ये सुरू करण्यात आली. पूर्वी प्रतिदेयक तीन रुपये सूट होती. ही सवलत १ डिसेंबर २०१८ पासून प्रतिबिल १० रुपये करण्यात आली. आता पहिल्याच देयकामध्ये बारा महिन्यांची एकरकमी १२० रुपये सवलत देण्याचा निर्णयही घेण्यात आला आहे.

वीजग्राहकांनी या पर्यावरणपूरक योजनेत स्वत:हून सहभागी होणे अपेक्षित असून, प्रसिद्धी माध्यमे, समाज माध्यमे, महावितरणची वेबसाइट, मोबाइल ॲप, छापील वीजबिल तसेच गणेशोत्सव, यात्रा, प्रदर्शनांसह सार्वजनिक गर्दीच्या विविध ठिकाणी जनजागृती करण्यात येत आहे. ‘गो ग्रीन’कडे वीजग्राहकांचा प्रतिसाद हळूहळू वाढत असल्याचे ‘महावितरण’कडून सांगण्यात आले.

देयके ऑनलाइन भरणारे ७५ ते ८० टक्के

महावितरणचे राज्यातील ७५ ते ८० टक्के वीजग्राहक ऑनलाइन पद्धतीने यूपीआय, डेबिट-क्रेडिट कार्ड अशा माध्यमातून देयकांचा दरमहा भरणा करतात, असे महावितरणकडून स्पष्ट करण्यात आले.

‘गो-ग्रीन’चा पर्याय असा निवडा

वीजग्राहकांनी ‘गो-ग्रीन’ योजनेचा पर्याय निवडण्यासाठी ‘महावितरण’चे मोबाइल ॲप किंवा http://www.mahadiscom.in संकेतस्थळावर अधिक माहिती उपलब्ध आहे. संकेतस्थळावर चालू वीजबिलासह मागील ११ महिन्यांची देयके मूळ स्वरूपात उपलब्ध आहेत. आवश्यकतेप्रमाणे वीजग्राहकांना ती कधीही डाउनलोड करण्याची किंवा मूळ स्वरूपात रंगीत प्रिंट करण्याची सोय आहे. त्यामुळे वीज ग्राहकांनी ‘गो-ग्रीन’ योजनेतून ऑनलाइन वीज देयक स्वीकारण्याचे आवाहन ‘महावितरण’कडून करण्यात आले.