पुणे : पबमालक, कर्मचाऱ्यांचा जामिनासाठी अर्ज; उद्या सुनावणी

पुणे : कल्याणीनगरमधील अपघात प्रकरणातील अल्पवयीन मुलासह त्याच्या मित्रांना मद्य पुरविल्याप्रकरणी अटकेत असलेल्या कोझी आणि ब्लॅक पबच्या मालकांसह कर्मचाऱ्यांनी शिवाजीनगर न्यायालयात जामिनासाठी अर्ज केला आहे. जामीन अर्जावर बुधवारी (२९ मे) सुनावणी होणार आहे.

कल्याणीनगर अपघात प्रकरणात अल्पवयीन मुलाला मोटार दिल्याप्रकरणी त्याचे बांधकाम व्यावसायिक वडील विशाल सुरेंद्र अगरवाल (वय ५०, रा. ब्रह्मा सनसिटी, वडगाव शेरी) याच्यासह मद्यविक्री प्रकरणात कोझी पबचे मालक नमन प्रल्हाद भुतडा (वय २५, रा. ए ७, पद्म विलास एन्क्लेव्ह, वानवडी), व्यवस्थापक सचिन अशोक काटकर (वय ३५, रा. साईसदन ए २, तुकाईदर्शन, हडपसर), ब्लॅक पबचे मालक संदीप रमेश सांगळे (वय ३५, रा. ऑस्कर शाळेसमोर, फ्लॅट नं. १०७, पद्मावती हाईट्स, केशवनगर, मुंढवा), कर्मचारी नीतेश धनेश शेवानी (वय ३४ रा. एनआयबीएम रस्ता, कोंढवा), व्यवस्थापक जयेश सतीश गावकर (वय २३, रा. केशवनगर) यांना या गुन्ह्यात अटक करण्यात आली होती. या गुन्ह्यात भुतडा, काटकर, सांगळे, शेवानी यांना न्यायालयीन कोठडीत ठेवण्याचा आदेश देण्यात आला आहे. अगरवाल याला मोटारचालकाला धमकाविल्याप्रकरणी अटक करण्यात आली आहे.

आणखी वाचा-पोर्श अपघातानंतर क्लब मालकांना आली जाग, पुण्यातील उद्योजकाने सांगितली पब्समधील सद्यस्थिती

न्यायालयीन कोठडीत असलेले भुतडा, काटकर, सांगळे, गावकर यांनी शिवाजीनगर न्यायालयात जामीन मिळवण्यासाठी अर्ज दाखल केला. त्यांच्या जामीन अर्जावर बुधवारी (२९ मे) सुनावणी होणार आहे.