ठाणे : घोडबंदर येथील नागलाबंदर भागात खडी यंत्रामध्ये पडून भलबद्र यादव (४०) या मजुराचा मृत्यू झाला आहे. सुरक्षा साधने पुरविली नसल्याप्रकरणी खडी यंत्र मालकाविरोधात कासारवडवली पोलीस ठाण्यात गुन्हा दाखल करण्यात आला आहे.
नागलाबंदर भागात भलबद्र हे त्यांची पत्नी, तीन मुली आणि एका मुलासोबत राहत होते. ते परिसरात खडी यंत्र चालविण्याचे काम करतात. गुरुवारी सांयकाळी ते खडी यंत्रामध्ये खडीची पावडर करण्याचे काम करत होते. त्यावेळी तोल जावून ते या यंत्रात पडले. यंत्र सुरू असल्याने ते त्यात अडकले. घटनेची माहिती परिसरातील इतर मजुरांना मिळाली. त्यानंतर यंत्र बंद करण्यात आले. मजुरांनी त्यांना खडी यंत्रामधून बाहेर काढले. त्यांना खासगी रुग्णालयात उपचारासाठी दाखल करण्यात आले. त्यानंतर तेथून त्यांना ठाणे जिल्हा शासकीय रुग्णालयात नेण्यात आले. डाॅक्टरांनी त्यांना तपासले असता, त्यांना मृत घोषित करण्यात आले.
या घटनेनंतर संपूर्ण परिसरात हळहळ व्यक्त केली जात आहे. याप्रकरणी भलबद्र यांची पत्नी संजू हिने कासारवडवली पोलीस ठाण्यात तक्रार दाखल केली. याप्रकरणी खडी यंत्र मालकाविरोधात गुन्हा दाखल करण्यात आला आहे.