उल्हासनगर : ‘कोंबडी पळाली तंगडी धरून लंगडी घालाया लागली’, कोंबडीवरच हे सुप्रसिद्ध गाणं सर्वांना ठाऊक आहेच. मात्र एक कोंबडा शेजाऱ्याच्या घरात पळाल्याने झालेल्या वादातून तुंबळ हाणामारी झाल्याचे समोर आले आहे. यात कोंबडा मालकावर गुन्हा दाखल झाला असून ज्यांच्या घरात हा कोंबडा शिरला त्यांना मारहाण झाली आहे. या कोंबडा पळाल्याची चर्चा सध्या अंबरनाथ तालुक्यात सर्वत्र लागली आहे.
हिललाईन पोलीस ठाण्याच्या वतीने देण्यात आलेल्या माहितीनुसार अंबरनाथ तालुक्यातील खोणी गावाजवळ शेलार पाडा येथे विलास वाघे आणि गुरुनाथ वाघे हे कुटुंबीय राहतात. शेजारी शेजारी या कुटुंबीयांची घरे आहेत. शुक्रवार २ एप्रिल रोजी सकाळी साडे नऊच्या सुमारास विलास वाघे यांचा कोंबडा गुरुनाथ वाघे यांच्या घरात शिरला. गुरुनाथ वाघे यांच्या पत्नी मनीषा वाघे यांनी हा कोंबडा हाकलण्यासाठी दगड फेकला. कोंबड्याला दगड मारून फेकल्याचा राग कोंबड्याचे मालक विलास वाघे यांना आला. त्यामुळे विलास वाघे यांनी मनीषा वाघे यांना शिवीगाळ करण्यास सुरुवात केली. माझ्या पत्नीला शिवीगाळ का करतो आहेस, असा जाब गुरुनाथ वाघे यांनी विचारला असता विलास वाघे यांना राग आला. त्यामुळे विलास वाघे यांनी जमिनीवरील दगड उचलून गुरुनाथ वाघे यांच्या डोक्यात डाव्या कानाच्या बाजूला मारून फेकला. त्यामुळे गुरुनाथ वाघे खाली पडले. त्यानंतर विलास वाघे, कैलास वाघे आणि कुदन वाघे यांनी आपापसात संगणमत करून गुरुनाथ वाघे यांना शिवीगाळ केली. त्याच वेळेस त्यांना हाताने ठोशाबुक्याने मारहाण सुद्धा केली
गुरुनाथ वाघे यांना मारहाण होत असल्याचे पाहताच त्यांचा मेहुणा बाळाराम वाघे, मनीषा वाघे हे तिथे आले. यावेळी विलास, कैलास आणि कुदन या तिघांनी त्यांना देखील ठोशाबुक्याने मारहाण केली. तसेच बाळाराम वाघे याच्या डोक्यात डाव्या बाजूला लाकडी दांडक्याने मारहाण करत दुखापत केली.
या प्रकारानंतर गुरुनाथ वाघे यांनी हिल लाईन पोलीस ठाण्यात धाव घेत तक्रार दिली त्यांनी दिलेल्या तक्रारीवरून विलास वाघे, कैलास वाघे, कुदन वाघे या तिघांविरुद्ध गुन्हा दाखल करण्यात आला आहे. हिललाईन पोलीस या प्रकरणाचा अधिक तपास करत आहेत. मात्र अंबरनाथ तालुक्यात सध्या कोंबड्यावरून झालेल्या या वादाची चांगलीच चर्चा रंगली आहे.