रात्री झोपण्यापूर्वी करा ‘या’ ३ गोष्टी; केस गळती थांबून होतील घनदाट

केसांचे आरोग्य निरोगी ठेवण्यासाठी रात्री झोपण्यापूर्वी करा ‘या’ गोष्टी

१) सिल्क कापडाच्या उशीचा वापर करा

उशी कव्हरच्या विविध प्रकारांचा तुमच्या केसांवर परिणाम होत असतो. जर तुम्ही खडबडीत किंवा घाणेरड्या उशीच्या कव्हरवर डोके ठेवून झोपत असाल तर तुमचे केस घर्षणामुळे ओढले जातात किंवा तुटतात. पण सिल्क किंवा मलमलच्या कापडापासून बनवलेल्या उशीच्या कव्हरवर डोके ठेवून झोपल्याने घर्षण होत नाही आणि केस खराब होण्याचा धोका कमी असतो.

२) केस थोडे मोकळे ठेवून झोपा

केस खूप घट्ट बांधले तर केस मुळापासून खेचले जातात आणि तुटतात. पण जर तुम्ही केस मोकळे ठेवून झोपत असाल तर त्याचाही तुमच्या केसांवर परिणाम होतो. अशा परिस्थितीत खूप सैल वेणी घालून झोपणे चांगले. यामुळे तुमचे केस जसेच्या तसे राहतील, खेचले जाणार नाहीत आणि तुटणे देखील टाळता येईल.

३) केस ओले ठेवून झोपू नका

अनेक मुलींना सकाळी केस धुण्याचा कंटाळा येत असल्याने त्या रात्री झोपण्यापूर्वी केस धुतात आणि झोपतात. पण रात्री केस ओले ठेवून झोपल्याने केस जास्त तुटतात. याशिवाय ओले केस ठेवून झोपल्याने टाळूशी संबंधित समस्या उद्भवू शकतात.याशिवाय केसांना दुर्गंधी येण्याची शक्यता असते. जर तुम्हालाही ही सवय असेल तर ती लगेच बदला.

केसांच्या निरोगी आरोग्यासाठी ‘या’ टिप्स ठेवा लक्षात

१) तुम्ही रात्री झोपण्यापूर्वी आठवड्यातून एक किंवा दोनदा केसांना तेलाने मसाज करा. केस जास्त कोरडे असतील तर झोपण्यापूर्वी खोबरेल तेल लावा.

२) केस रात्री फणीने विंचरुन झोपल्याने केस सिल्की दिसतात. विंचरलेल्या केसांचा झोपेत जास्त गुंता होत नाही. यामुळे केस तुटण्याची चिंता नसते.

३) घट्ट रबर बँड वापरण्याऐवजी केसांना सिल्क किंवा सॅटिन स्क्रंचीने बांधा. स्क्रंची मऊ असते आणि त्यामुळे केस तुटत नाहीत..