बहुचर्चित आणि बहुप्रतिक्षीत ‘बिग बॉस मराठी’ सिझन ३ ची दणक्यात सुरवात झाली आहे. जवळपास दोन वर्षांनंतर बिग बॉस मराठी हा शो प्रेक्षकांच्या भेटीला आला आहे. त्यामुळे शो बाबत प्रेक्षकांमध्ये प्रचंड उत्सुकता पाहायला मिळते. यंदाच्या सिझनमध्ये स्पर्धक म्हणून अभिनेत्री स्नेहा वाघ आणि तिचा पहिला पती आविष्कार दारव्हेकरने बिग बॉस मराठीच्या घरात एन्ट्री घेतली आहे. पहिल्या दिवसापासूनच या दोघांच्या भूतकाळाबद्दल घरात आणि प्रेक्षकांमध्ये चर्चा सुरू आहे. अलिकडच्या भागात आविष्कारने त्याच्या पूर्वाश्रमीच्या पत्नी विषयी आणि त्यांचे हे लग्न का मोडले या विषयी मोठा खुलासा केला आहे.
आविष्कार त्याचा सहस्पर्धक जय दुधानेला सांगिताना दिसला की जेव्हा स्नेहा वाघ आणि त्याचे नातं तुटलं तेव्हा स्नेहाने त्याच्यावर अनेक आरोप केले होते. एव्हढंच नव्हे तर घटस्फोटानंतर त्याला मद्यपानाचे व्यसन लागले होते आणि तो कबीर सिंग बनला होता, असे तो जयला सांगताना दिसला. यावर जय आविष्कारला म्हणाला की घरात तर स्नेहा ही खूप शांत आणि साध्या स्वभावाचे व्यक्तिमत्व वाटते. तर आविष्कारने सांगितले की ती अजिबात शांत नाही आहे आणि तिचे खरे रुप लवकरच समोर येईल.
आविष्कार पुढे म्हणाल, “स्नेहा ही घरात स्पर्धक म्हणून येणार आहे हे मला माहिती नव्हते आणि मला माझ्या भूतकाळात परत जायची अजिबात इच्छा नाही, बहुतेक इतके वर्षांनी हे दोघे एकत्र कसे राहतात हे बिग बॉसला दाखवायचे असेल म्हणून कदाचित त्यांनी आम्हाला एकत्र आणले असावे”. तसंच बिग बॉस मराठीने त्याला आयुष्यात दुसरी संधी दिली आहेआणि तो याची कदर करतो असल्याचे तो जयला सांगताना दिसला आहे.
अवघ्या १९ वर्षांची असताना स्नेहाने अविष्कारसोबत लग्नगाठ बांधली होती. मात्र काही वर्षातच ते विभक्त झाले. स्नेहाने अविष्कारवर घरगुती हिंसाचाराचे आरोप केले होते. एका मुलाखती मध्ये स्नेहा वाघने तिला घरगुती हिंसाचाराचा सामना करावा लागला असून तो काळ तिच्यासाठी खूपच कठीण असल्याचा खुलासा केला होता.