अभिनेत्री जुई गडकरी सध्या ‘ठरलं तर मग’ या मालिकेमुळे चांगलीच चर्चेत आहे. यामध्ये जुई ‘सायली’ ही भूमिका साकारत आहे. मध्यंतरी आजारपणामुळे अभिनेत्रीने कलाविश्वातून ब्रेक घेतला होता. परंतु, ‘ठरलं तर मग’ या मालिकेद्वारे तिने अभिनय क्षेत्रात दमदार पुनरागमन केलं आहे. मालिकेमध्ये मंगळागौरीचं शूटिंग सुरु असताना जुई आणि तिचा सहकलाकार अमित भानुशालीने मीडियाशी संवाद साधला. यावेळी जुई गडकरीने तिच्या खऱ्या आयुष्यातील लग्नाच्या तारखेबद्दल खुलासा केला.
हेही वाचा : मलायका अरोरा आणि अर्जुन कपूरचं ब्रेकअप? अभिनेत्रीने शेअर केलेल्या ‘त्या’ पोस्टमुळे चर्चांना उधाण
जुई गडकरी साकारत असलेल्या ‘सायली’ या पात्राला प्रेक्षकांचा भरभरून प्रतिसाद मिळत आहे. सायलीच्या वैयक्तिक जीवनाविषयी जाणून घेण्यास चाहते उत्सुक असतात. अलीकडेच ‘हंच मीडिया’ला दिलेल्या मुलाखतीत जुईने खऱ्या आयुष्यात लग्न केव्हा करणार? याबद्दल माहिती दिली आहे.
जुई आणि तिचा सहकलाकार अमित भानुशाली हे दोघंही एकमेकांचे चांगले मित्र असल्याने अमितला तिच्या लग्नाची तारीख काय असा प्रश्न विचारण्यात आला. यावर अभिनेत्याने २४ फेब्रुवारी २०२४ असं उत्तर दिलं. पण, अमितने सांगितलेली तारीख दुरुस्त करत जुई म्हणाली, अमित थोडासा चुकलाय कारण, लग्नाची तारीख ४ आहे… महिना फेब्रुवारीचं असेल. यंदा माझा व्हॅलेंटाईन डे जरा चांगला साजरा होणार आहे.
“मी माझ्या जोडीदाराला सगळ्यात मौल्यवान गोष्ट गिफ्ट म्हणून देणार आहे…माझा वेळ आणि माझं संपूर्ण आयुष्य. असं जुईने सांगितलं. मात्र, अभिनेत्रीने होणाऱ्या नवऱ्याचं नाव सांगितलेलं नाही. दरम्यान, ‘ठरलं तर मग’ ही मालिका पहिल्या दिवसापासून टीआरपीच्या शर्यतीत पहिल्या क्रमांकावर आहे. या मालिकेत जुई गडकरी, अमित भानुशाली, प्राजक्ता दिघे, प्रियांका तेंडोलकर, मोनिका दाभाडे, सागर तलशीकर, शिल्पा नवलकर हे कलाकार महत्त्वाच्या भूमिका साकारत आहेत.