पुणे : काँग्रेसच्या शहराध्यक्षपदी ज्येष्ठ नेते, स्थायी समितीचे माजी अध्यक्ष आणि माजी गटनेता अरविंद शिंदे यांची नियुक्ती करण्यात आली आहे. शिंदे यांची प्रभारी शहराध्यक्षपदी नियुक्ती झाली असून पक्षाची संघटनात्मक निवडणूक प्रक्रिया सुरू असून ती पूर्ण झाल्यानंतर ते शहराध्यक्ष म्हणून सूत्रे स्वीकारतील. आगामी महापालिका निवडणूक शिंदे यांच्या नेतृत्वाखाली लढविली जाईल.
काँग्रेसच्या शिर्डी येथील नवसंकल्प शिबिरातील ठरावानुसार पाच वर्षांपासून जास्त काळ शहराध्यक्षपदावर कार्यरत असलेले शहराध्यक्ष रमेश बागवे यांनी पदाचा राजीनामा दिला होता. त्यामुळे शहराध्यक्षपद रिक्त झाले होते.
शहराध्यक्षपदावर नियुक्ती होण्यासाठी पक्षातील ज्येष्ठ नेत्यांची मोर्चेबांधणी सुरू झाली होती. पक्षाची संघटनात्मक निवडणूक प्रक्रिया सुरू आहे. त्यामुळे सध्या प्रभारी शहराध्यक्ष म्हणून बागवे काम पहातील, अशी शक्यताही पदाधिकाऱ्यांकडून व्यक्त करण्यात आली होती. मात्र प्रदेश काँग्रेसकडून अरविंद शिंदे यांच्या नावाची घोषणा मंगळवारी करण्यात आली. सध्या ते प्रभारी शहराध्यक्ष असले तरी संघटनात्मक निवडणुकीनंतर ते पूर्णवेळ शहराध्यक्ष होतील, असे पक्षाच्या पदाधिकाऱ्यांनी सांगितले.
अरविंद शिंदे हे पक्षाचे अनुभवी नगरसेवक आहेत. स्थायी समितीचे अध्यक्षपद, गटनेता यासह महापालिकेतील विविध पदांवर त्यांनी काम केले आहे. काँग्रेसच्या शहराध्यपदासाठी ते आग्रही होते. यापूर्वीही त्यांच्या नावाची चर्चा होती. त्यानुसार त्यांची निवड करण्यात आली आहे. आगामी महापालिका निवडणूक त्यांच्या नेतृत्वाखाली लढविली जाणार आहे.