“माझ्या घरावर हल्ला करणाऱ्यांमध्ये…”, मराठा आंदोलकांवरील आरोपांनंतर प्रकाश सोळंकेंचं खळबळजनक वक्तव्य

३००-४०० मराठा आंदोलकांनी प्रकाश सोळंके यांच्या घरावर हल्ला केल्याचं बोललं जात होतं. आंदोलकांनी सोळंके यांच्या घरावर दगडफेक केली. घराबाहेर उभ्या असलेल्या वाहनांच्या काचा फोडून सर्व वाहनं जाळली. यावेळी घटनास्थळी उपस्थित असलेल्या पोलिसांनी जमावाला पांगवण्याचा प्रयत्न केला. मात्र जमाव काहीही ऐकून घ्यायला तयार नव्हता. या हल्ल्यानंतर आतापर्यंत पोलिसांनी २१ जणांना अटक केली आहे. दरम्यान, प्रकाश सोळंके यांनी आज पत्रकार परिषद घेऊन हल्ल्याबाबत मोठा गौप्यस्फोट केला आहे.

प्रकाश सोळंके म्हणाले, माझ्या घरावर हल्ला करण्यासाठी आलेल्या ४ ते ५ हजार लोकांच्या जमावापैकी २०० ते २५० लोक हे समाजकंटक होते. त्यापैकी बहुसंख्य हल्लेखोर हे अवैध धंदा करणारे होते. यात माझे राजकीय विरोधकही होते. या हल्ल्याप्रकरणी आतापर्यंत जवळजवळ २१ लोकांना अटक केली आहे. त्यातले ८ आरोपी हे मराठा समाजाचे नाहीत. मराठ्यांव्यतिरिक्त इतरही जाती-धर्माचे लोक या हल्लेखोरांमध्ये होते.

हे ही वाचा >> “जाळपोळ करणारे सत्ताधारी पक्षातील लोक, हे थांबवा अन्यथा…”, जरांगे-पाटलांचं विधान

राष्ट्रवादीचे आमदार प्रकाश सोळंके म्हणाले, हल्लेखोर पूर्ण तयारीनिशी आले होते. त्यांच्या तयारीवरून मला असं वाटतंय की त्यांचा थेट हेतू दगडफेक आणि जाळपोळ करण्याबरोबरच माझ्या जीविताला हानी पोहोचवण्याचा होता. मला मारण्याचा कट रचूनच ते तिथे आले होते. परंतु, हल्लेखोर माझ्यापर्यंत पोहोचू शकले नाहीत. हा हल्ला जेव्हा झाला तेव्हा मी माझ्या घरात होतो. सुदैवाने माझ्या कुटुंबातील कोणीही सदस्य किंवा कर्मचारी जखमी झाले नाही. आगीमुळे मालमत्तेचे मोठं नुकसान झालं आहे.