Grammys 2025 : चार वेळा पुरस्कार जिंकणाऱ्या झाकीर हुसैन यांना श्रद्धांजली वाहण्यास आयोजक विसरले, सोशल मीडियावर संताप

दरवर्षी, ग्रॅमी पुरस्कार आयोजनकर्ते त्यांच्या ‘इन मेमोरियम मोंटेज’मध्ये संगीत क्षेत्रात अमूल्य कामगिरी करणाऱ्या दिग्गजांना श्रद्धांजली वाहतात. झाकीर हुसैन यांचं गेल्यावर्षी निधन झालं. एकाच वर्षी एकूण ३ ग्रॅमी पुरस्कार जिंकणारे झाकीर हुसैन हे पहिले भारतीय होते. गेल्यावर्षी १५ डिसेंबर रोजी सॅन फ्रान्सिस्कोच्या रुग्णालयात इडिओपॅथिक पल्मोनरी फायब्रोसिसमुळे त्यांचं निधन झालं, ते ७३ वर्षांचे होते.

ग्रॅमीच्या ‘इन मेमोरियम’ विभागात, जेव्हा निधन झालेल्या कलाकारांना श्रद्धांजली वाहण्यात येत होती, तेव्हा झाकीर हुसैन यांचं नाव त्यात नव्हतं. यावर भारतीय तसेच आंतरराष्ट्रीय चाहत्यांनी देखील आक्षेप घेतला आहे. सोशल मीडियावरील अनेक युजर्सनी यावर तीव्र प्रतिक्रिया दिल्या आहेत. तसेच रेकॉर्डिंग अकादमीला टॅग करून या चुकीबद्दल प्रश्न उपस्थित करण्यात आले आहेत.

“ग्रॅमीच्या ‘इन मेमोरियम’ सेगमेंटमध्ये झाकीर हुसैन यांचं नाव कसं नव्हतं? ते गेल्यावर्षीचे विजेते आहेत”, “श्रद्धांजली विभागात त्यांचा उल्लेख न करणं ही खरोखरच एक मोठी चूक आहे”, “ग्रॅमी पुरस्कार विजेते आणि अनेकदा ग्रॅमीचं नामांकन मिळूनही झाकीर हुसैन यांना श्रद्धांजली विभागामध्ये समाविष्ट न करणं ही खरंच लाजिरवाणी गोष्ट आहे.” असं युजर्सनी एक्स पोस्ट करत म्हटलं आहे.

दरम्यान, या वर्षीच्या ग्रॅमी पुरस्कार सोहळ्यात अनेक महान संगीतकारांना आदरांजली वाहण्यात आली, ज्यात लियाम पेन, क्रिस क्रिस्टोफरसन, सिसी ह्यूस्टन, टिटो जॅक्सन, जो चेंबर्स, जॅक जोन्स, मेरी मार्टिन, मारियान फेथफुल, सेजी ओझावा आणि एला जेनकिन्स यांसारख्या दिग्गजांचा समावेश आहे.