'छोटा पुढारी'ला आहे यकृत, किडनी अन् फुफ्फुसांचा त्रास, कमी उंचीचं आहे 'हे' कारण...; आजारपणाबद्दल झाला व्यक्त

'बिग बॉस मराठी’च्या पाचव्या पर्वातून अनेक जण प्रसिद्धीझोतात आले. त्यापैकी एक नाव म्हणजे छोटा पुढारी अर्थात घन:श्याम दरवडे. घनश्यामला अनेकदा त्याच्या कमी उंचीमुळे अपमान आणि ट्रोलिंग सहन करावं लागलं आहे. त्याबद्दल त्यानं अनेक मुलाखतींमधून सांगितलं आहे. अशातच घनश्यामनं त्याला लहानपणापासून आजारपण असल्याचंही सांगितलं. घनश्यामला लहानपणापासून किडनी, यकृत व फुप्फुसांसंबंधित आजार आहेत. याबद्दल तो म्हणाला, "मी सहा वर्षांचा होईपर्यंत हॉस्पिटलमध्येच होतो. कारण- मला जन्मत:च काही त्रास होता. मला यकृत आणि किडनीचा त्रास अजूनही आहे." यापुढे तो म्हणतो, "माझी उंची कमी असल्यामुळे गावी मला डावललं जायचं; मला लोकांनी स्वीकारलं नसलं; तरी माझ्या आई-वडिलांनी माझा स्वीकार केला." यानंतर घन:श्याम म्हणाला, "कमी ऊंचीबद्दल डॉक्टरांना विचारलं, तेव्हा त्यांनी मला सांगितलं की, मला आनुवंशिकतेचा त्रास आहे. तेव्हाच मला थायरॉईडचा त्रास होता." यानंतर त्याने सांगितलं, "माझ्या यकृत व फुप्फुसांना सूज आहे. मी आजही इंजेक्शन घेतो. कारण- माझं रक्त आपोआप तयार होत नाही. रक्त शुद्ध करण्यासाठी मला इंजेक्शन घ्यावं लागतं." दरम्यान, घनश्यामच्या कामाबद्दल बोलायचं झालं, तर तो सध्या स्टार प्रवाहवरील 'शिट्टी वाजली रे' या कार्यक्रमातून प्रेक्षकांच्या भेटीला येत आहे. (फोटो सौजन्य : इन्स्टाग्राम) तसंच घनश्याम सोशल मीडियावरही तितकाच सक्रिय असतो. सोशल मीडियाद्वारे तो काही राजकीय आणि सामाजिक विषयांवर व्यक्त होताना दिसतो.