रात्रीच्या जेवणात पोळी की भात? पचनासाठी योग्य निवड कोणती, वाचा तज्ज्ञांचं मत…

पोळी आणि तांदूळ हे दोन्ही भारतीय आहारातील मुख्य घटक आहेत; परंतु पचन प्रक्रिया व आरोग्याच्या दृष्टीने त्यांच्यात महत्त्वाचा फरक आहे. पोळी, विशेषतः गव्हाच्या किंवा मल्टीग्रेन पिठापासून बनवलेली असते आणि त्यात फायबर भरपूर असते. त्यामुळे जेवणानंतर जास्त वेळ पोट भरल्यासारखं वाटतं. मात्र, रात्री पोळी थोडी जड वाटू शकते. पचन मंदावल्यामुळे झोपताना पोट फुगणं किंवा पोट जड झाल्यासारखं वाटू शकतं. दुसरीकडे तांदळाच्या, विशेषतः पांढऱ्या तांदळाच्या भातात कमी फायबर असल्यामुळे तो सहज आणि पटकन पचतो. त्यामुळे रात्री तो पोटासाठी हलका पडतो. भाताचं पचन जलद गतीनं होत असल्यामुळे रात्री जेवल्यानंतर अधिक शांत आणि आरामदायी झोप मिळू शकते. परंतु, भात लवकर पचल्यामुळे पुन्हा भूक लागण्याची शक्यता जास्त असते, त्यामुळे डाळ, भाजी किंवा प्रथिनांसोबतच भात खाणं गरजेचं आहे. रात्रीचं जेवण फक्त कार्बोहायड्रेटवर आधारित न ठेवता, त्यात भाज्या, प्रथिने आणि मर्यादित तेलाचा समावेश केल्यास पचन व्यवस्थित होतं. रात्री शारीरिक हालचाल कमी होत असल्यानं पचन नैसर्गिकरीत्या मंद होतं; जड जेवण टाळल्यास पोटदुखी किंवा अॅसिडिटीसारखे त्रास कमी होतात. शेवटी प्रत्येकाच्या पचनशक्तीनुसार वेगवेगळी निवड केली जाते. काहींना पोळी चांगली लागते, तर काहींना तांदूळ हलका वाटतो. शरीराला योग्य काय ते अनुभवातून ठरवणं उत्तम ठरतं.(फोटो सौजन्य : FreePik)