वडिलांनी लहानपणी लैंगिक शोषण केल्याचा खुलासा करणाऱ्या खुशबू सुंदर कोण आहेत?

सुप्रसिद्ध दाक्षिणात्य अभिनेत्री आणि भाजपा नेत्या खुशबू सुंदर यांनी एक खळबळजनक खुलासा केला आहे. आठ वर्षांच्या असल्यापासून त्यांचे वडील त्यांचं लैंगिक शोषण करत होते, असं त्यांनी सांगितलं आहे. अलीकडेच त्यांनी राष्ट्रीय महिला आयोगाच्या सदस्या म्हणून कार्यभार स्वीकारला आहे. अनेक वर्षांनी आपल्या वैयक्तिक आयुष्याबद्दल खुलासा करणाऱ्या खुशबू सुंदर कोण आहेत, ते जाणून घेऊयात. ‘द बर्निंग ट्रेन’ या बॉलिवूड चित्रपटातून आपल्या करिअरची सुरुवात करणाऱ्या खुशबू यांनी अनेक चित्रपटांमध्ये काम केलं आहे. खुशबू सुंदर या दाक्षिणात्य चित्रपट सृष्टीतील मोठ्या स्टार होत्या. त्यांनी २०० पेक्षा जास्त चित्रपटांमध्ये काम केले आहे. १९८५ साली 'मेरी जंग' चित्रपटात खुशबू यांनी 'बोल बेबी बोल, रॉकेन रोल' या गाण्यावर जावेद जाफरीबरोबर डान्स केला होता. बॉलिवूडमध्ये १९८५ साली 'जानू' या चित्रपटात त्यांनी जॅकी श्रॉफबरोबर मुख्य भूमिका साकारली होती. १९९० साली 'दीवाना मुझसा नही' या चित्रपटात आमिर खान आणि माधुरी दिक्षित यांच्याबरोबर महत्त्वाची भूमिका साकारली होती. खुशबू यांनी २०१० मध्ये द्रमुक पक्षात प्रवेश करून राजकीय कारकिर्दीची सुरुवात केली होती. २०१४ मध्ये त्यांनी काँग्रेसमध्ये प्रवेश केला होत्या. त्या सहा वर्षे काँग्रेसमध्ये होत्या. २०२० मध्ये त्यांनी काँग्रेसला सोडचिट्ठी देऊन भाजपामध्ये प्रवेश केला होता. सोनिया गांधींना राजीनामा सोपवून दिल्लीतील भाजपा मुख्यालयात पक्षाच्या वरिष्ठ नेत्यांच्या उपस्थितीत त्यांनी पक्षात प्रवेश केला होता. सध्या त्या त्यांनी वैयक्तिक आयुष्याबद्दल आणि लहानपणी झालेल्या अत्याचाराबद्दल खुलासा केल्याने चर्चेत आहेत. (सर्व फोटो - खुशबू सुंदर यांच्या इन्स्टाग्रामवरून साभार)