हनुमान मंदिराचा भव्य देखावा! अभिज्ञा भावेने बाप्पासाठी 'असं' सजवलंय संपूर्ण घर, फोटो पाहिलेत का?

लाडक्या बाप्पाच्या आगमनामुळे सर्वत्र आनंदाचं वातावरण निर्माण झालं आहे. मनोरंजन विश्वातील कलाकारांनी सुद्धा मोठ्या उत्साहात आणि जयघोषात बाप्पाचं स्वागत केलं आहे. लोकप्रिय अभिनेत्री अभिज्ञा भावेच्या घरी सुद्धा बाप्पाचं आगमन झालेलं आहे. अभिनेत्रीच्या घरी यंदा कोणता देखावा असणार याची उत्सुकता गेल्या काही दिवसांपासून तिच्या चाहत्यांच्या मनात निर्माण झाली होती. अभिज्ञाने यापूर्वी स्वामी समर्थ अक्कलकोट मंदिर तसेच गेल्यावर्षी तिरुपती बालाजी मंदिराचा देखावा साकारला होता. यंदा अभिज्ञा व तिचा पती मेहुल पै यांनी बाप्पाच्या स्वागतासाठी भव्य हनुमान मंदिराचा देखावा साकारला आहे. अभिज्ञाने या देखाव्याचे सुंदर फोटो सोशल मीडियावर शेअर केले आहेत. बाप्पासाठी अभिज्ञा-मेहुलच्या संपूर्ण घरात फुलांची सजावट करण्यात आली आहे. अभिज्ञा कॅप्शनमध्ये लिहिते, "राम दूत अतुलित बल धामा || अंजनी पुत्र पवनसुत नामा || यावर्षी आमच्याकडे विराजमान आहेत... रामभक्त पवन पुत्र हनुमान" अभिज्ञा आणि मेहुल दरवर्षी गणेशोत्सवासाठी घराच्या प्रवेशद्वारापासूनच सजावट करण्यास सुरुवात करतात. प्रवेशद्वाराजवळ लिहिलेला 'ॐ हं हनुमते नमो नमः' हा श्लोक सर्वांचं लक्ष वेधून घेतो. प्रवेशद्वाराजवळ 'जय श्री राम' लिहून केलेली फुलांची सजावट, संस्कृत श्लोक, बाप्पासाठी खास नैवेद्य या सगळ्याची झलक अभिज्ञाने शेअर केलेल्या फोटोंमध्ये पाहायला मिळत आहे. दरम्यान, अभिज्ञाने शेअर केलेल्या बाप्पाच्या सुंदर फोटोंवर चाहत्यांनी कौतुकाचा वर्षाव केला आहे. ( सर्व फोटो सौजन्य : अभिज्ञा भावे इन्स्टाग्राम )