Virat Kohli Puma Deal: विराट कोहलीने का नाकारला प्यूमाबरोबरचा ३०० कोटींचा करार? काय आहे भारतीय स्टार्ट्सअपचे कनेक्शन?

टीम इंडियाचा माजी कर्णधार विराट कोहलीने त्याच्या व्यवसायिक आयुष्यात मोठा बदल करण्याचा निर्णय घेतला आहे. विराटने पुमासोबरोबरचा त्याचा आठ वर्षांचा करार संपुष्टात आणत त्यांचा ३०० कोटी रुपयांच्या कारार नूतनीकरणाचा प्रस्ताव नाकारला आहे. प्यूमाबरोबर पुन्हा करार करण्याऐवजी, विराटने अॅजिलिटास स्पोर्ट्स या नवीन भारतीय स्पोर्ट्सवेअर स्टार्टअपमध्ये गुंतवणूक करण्याचा आणि त्याला आकार देण्यात सक्रिय भूमिका घेण्याचा निर्णय घेतला आहे. विराट कोहलीच्या या कृतीतून तो एंडोर्समेंट फीपेक्षा मोठा विचार करत, दीर्घकालीन मूल्याकडे पाहत आहे असे दिसते. २०१७ मध्ये, कोहलीने भारतातील खेळातील सर्वात हाय-प्रोफाइल करारांपैकी एक असलेल्या प्यूमाच्या ८ वर्षांच्या करारावर स्वाक्षरी केली होती. या कराराद्वारे त्याने ११० कोटी रुपये कमावले. या कराराद्वारे विराटने त्याचा वन ८ ब्रँड प्यूमाबरोबर भागीदारीत लाँच केला होता. यातून त्याने सुमारे २५० कोटी रुपयांची कमाई केली. दरम्यान अॅजिलिटास ही एक नवी कंपनी आहे, ज्याची स्थापना २०२३ मध्ये प्यूमा इंडिया आणि आग्नेय आशियाचे माजी व्यवस्थापकीय संचालक अभिषेक गांगुली यांनी केली होती. अॅजिलिटासने कन्व्हर्जंट फायनान्स आणि नेक्सस व्हेंचर पार्टनर्सकडून आधीच ६०० कोटी रुपयांचा निधी उभारला आहे. अॅजिलिटास कंपनीने अलीकडेच देशातील प्रमुख स्पोर्ट्स फूटवेअर उत्पादक कंपनी मोचिको शूज विकत घेतली आहे. (सर्व फोटो सौजन्य: @imVkohli/X)