Love Story: शरद पवार आणि प्रतिभाईताईंच्या लग्नाची ५६ वर्षे, सुप्रिया सुळेंनी फोटो पोस्ट करत दिला आठवणींना उजाळा

राष्ट्रवादी काँग्रेसचे संस्थापक शरद पवार यांच्या लग्नाचा आज ५६ वा वाढदिवस आहे. १ ऑगस्ट १९६७ रोजी शरद पवार यांनी प्रतिभा पवार यांच्यासह लग्नगाठ बांधली. शरद पवार यांची मुलगी खासदार सुप्रिया सुळे यांनी सोशल मीडियावर फोटो शेअर करत आई-बाबांना शुभेच्छा दिल्या आहेत. शरद पवार यांच्या यशस्वी कराकिर्दीत त्यांच्या पत्नी प्रतिभा पवार यांचा मोठा वाटा आहे. १९६७ साली आमदारकी मिळाल्यानंतर त्यांच्या पत्नी प्रतिभा पवार यांचे स्थळ त्यांच्यासाठी चालून आले होते. शरद पवारांचे मोठे बंधू माधवराव व अरविंद राणे यांची घट्ट मैत्री होती. इंग्लंडमध्ये ते एकत्र शिकत होते. या अरविंद राणेंना शरद पवार व त्यांची भावंडे 'इंग्लिश मामा' म्हणत असत असे. भारतीय क्रिकेट संघाचे नेतृत्व केलेले सदाशिव शिंदे हे अरविंद राणे यांचे जावई होते. शिवाजी पार्कवर सराव करत असताना सदाशिव शिंदे यांचं उष्माघाताने निधन झालं होतं. त्यामुळे त्यांची पत्नी आपल्या चार मुलींसह अरविंद राणे यांच्याकडे राहायल्या आल्या होत्या. त्यांच्याच चार मुलींपैकी एक कन्या म्हणजे प्रतिभा या होत्या. अरविंद राणे यांनी प्रतिभा यांच्यासाठी शरद पवारांचं स्थळ सुचवलं होतं. पण नुकतेच आमदार झालेले शरद पवार लग्न करण्यासाठी उत्सुक नव्हते. त्यांच्या आई त्यांना स्थळ पाहण्यासाठी घेऊन गेल्या होत्या. मुलगी बघायला शरद पवार आईच्या आग्रहाखातर गेले खरे, पण तिथे जाऊन ते वर्तमानपत्र उघडून तोंडासमोर धरुन वाचत बसले होते. त्यांनी प्रतिभा यांना पाहिलंसुद्धा नाही. पण होकार आला आणि त्यांचं लग्न ठरलं. बारामतीमध्ये त्यांचा शाही विवाहसोहळा पार पडला होता. शरद पवार यांच्या लग्नासाठी मुहुर्त काढण्यात आला नव्हता. यशवंतराव चव्हाण व वसंतराव नाईक आल्यानंतर त्यांचं लग्न लावायचं असं ठरलं होतं. लग्नाच्या दिवशीही दुपारी दोन वाजेपर्यंत शरद पवार कार्यकर्त्यांच्या भेटीगाठी घेत होते. (सर्व फोटो सौजन्य : सुप्रिया सुळे / सोशल मीडिया)