Flavoured Panipuri: पाणीपुरीच्या व्यवसायाला आधुनिकतेची जोड!; बुलढाण्यातील युवकाची अनोखी शक्कल
सुशिक्षित तरुणांना नोकरीच्या संधी कमी प्रमाणात उपलब्ध असल्याने अनेक तरुण व्यवसायासाठी धडपड करताना दिसतात मात्र व्यवसाय क्षेत्रात देखील मोठी स्पर्धा असल्याने अनेक जण निराश होतात; परंतु बुलढाणा जिल्ह्यातील सुशिक्षित तरुणाने जुन्या व्यवसायाला आधुनिकतेची जोड देत आपला व्यवसाय सुरू केला आहे. या व्यवसायाला ग्राहकाची मोठी पसंती मिळताना पाहायला मिळत आहे. खरंतर सर्व दूर पाणीपुरीचा व्यवसाय पाहायला मिळतो, परंतु याच व्यवसायाला एक वेगळ्या पद्धतीने ग्राहकांपुढे आणत बुलडाणा जिल्ह्यातील खामगाव शहरातील रोहित तळपते हा महिण्याकाठी जवळपास ३० हजार रुपये निव्वळ नफा कमावत आहे. रोहित तळपते यांनी आर्थिक दृष्टया सक्षम होण्यासाठी आपल्या खाजगी नोकरी सोबत व्यवसाय करण्याचं ठरवलं, आणि त्यांनी पाणीपुरीचा व्यवसाय सुरू केला, यामध्ये त्यांनी नावीन्य आणत सहा वेगवेगळ्या फ्लेवरमध्ये पाणीपुरी ग्राहकांसाठी उपलब्ध करून दिली आहे. स्वच्छतेच्या बाबतीत काळजी घेत सहा वेगवेगळ्या फ्लेवरमध्ये पाणीपुरी देण्याचा हा बुलढाणा जिल्ह्यातील पहिलाच प्रयोग आहे
