Photos: 'आई कुठे काय करते' मालिकेत आशुतोषच्या बहिणीची एण्ट्री, 'ही' अभिनेत्री साकारणार भूमिका

स्टार प्रवाहवरील 'आई कुठे काय करते' मालिका लोकप्रियतेच्या शिखरावर आहे. या मालिकेत सध्या 'वीणा' या पात्राचा उल्लेख वारंवार येतोय. ही 'वीणा' नेमकी आहे तरी कोण आणि तिची मालिकेत एण्ट्री नेमकी कश्यासाठी होतेय याविषयी प्रेक्षकांमध्ये कमालीची उत्सुकता आहे. ज्या पात्राविषयी इतकं भरभरुन बोललं जात आहे त्या 'वीणा'ची लवकरच 'आई कुठे काय करते' मालिकेत एण्ट्री होणार आहे. 'वीणा' म्हणजे आशुतोषची आत्ये बहिण. आई-वडिलांचं लहानपणीच निधन झाल्यानंतर 'आशुतोष'च्या आई-बाबांनी 'वीणा'चा संभाळ केला. 'वीणा' खूप मोकळ्या मनाची आहे. तिला प्रवासाची आवड आहे. कोणत्याही गोष्टीत अडकून रहाणं तिच्या तत्वात बसत नाही. म्हणूनच एक दिवस निरोपाची चिठ्ठी देऊन वीणा 'आशुतोष'च्या घरातून निघून गेली. 'वीणा'च्या जाण्याने सर्वांनाच वाईट वाटलं. 'वीणा'चे खुशालीचे फोन येत असत. आता इतक्या वर्षांनंतर 'वीणा' पुन्हा एकदा येतेय. सुप्रसिद्ध अभिनेत्री खुशबू तावडे 'वीणा' ही भूमिका साकारणार असून 'आई कुठे काय करते' मालिकेच्या कुटुंबात सामील होण्यासाठी ती खुपच उत्सुक आहे. या भूमिकेविषयी सांगताना खुशबू म्हणाली, माझ्या आयुष्यातली पहिली मालिका 'धर्मकन्या' मी स्टार प्रवाहवर केली होती. त्यानंतर जवळपास १२ वर्षांनंतर पुन्हा एकदा स्टार प्रवाहबरोबर काम करतेय. 'आई कुठे काय करते' ही मालिका लोकप्रियतेच्या शिखरावर आहे. यातील प्रत्येक पात्र प्रेक्षकांच्या रोजच्या जगण्याचा अविभाज्य भाग आहे. या लोकप्रिय मालिकेचा भाग होताना अत्यानंद होतोय. 'वीणा'च्या येण्याने 'अनिरुद्ध' आणि 'संजना'च्या नात्यात बरीच उलथापालथ घडणार आहे. त्यामुळे 'आई कुठे काय करते' मालिकेचे यापुढील भाग आणखी उत्कंठावर्धक होतील यात शंका नाही. (सर्व फोटो सौजन्य : खुशबू तावडे/इन्स्टाग्राम)