Photos: Met Gala 2025 मध्ये कियारा अडवाणीचा जलवा, पहिल्यांदाच बेबी बंप केला फ्लॉन्ट

जगातील सर्वात प्रतिष्ठित फॅशन इव्हेंट ‘मेट गाला २०२५’ न्यूयॉर्क येथे आयोजित केला आहे. न्यूयॉर्कच्या मेट्रोपॉलिटन म्युझियम ऑफ आर्ट येथे ५ मेला पार पडलेल्या ‘मेट गाला’मध्ये बॉलीवूड कलाकारांचा जलवा पाहायला मिळाला. यंदा ‘मेट गाला’मध्ये शाहरुख खान, कियारा अडवाणी, दिलजीत दोसांझ यांचं जबरदस्त पदार्पण झालं. शाहरुख खान हा ‘मेट गाला’मध्ये सहभागी होणारा पहिला भारतीय अभिनेता ठरला. तसंच कियारा अडवाणीने आपल्या बेबी बंपसह ‘मेट गाला’मध्ये पदार्पण केलं. ‘मेट गाला’च्या रेड कार्पेटवर लवकरच आई होणारी कियारा बेबी बंप फ्लॉन्ट करताना दिसली. कियाराने गौरव गुप्ताने डिझाइन केलेला काळ्या रंगाचा ऑफ-शोल्डर ड्रेस घातला होता. कियाराच्या ड्रेसच्या पुढच्या भागावर गोल्डन डिटेलिंग होतं. तिचा हा संपूर्ण लूक एका पांढऱ्या रंगाच्या ट्रेलने पूर्ण केला होता. कियाराच्या बेबी बंपवर गोल्डन रंगाचा हार्ट शेप बनवला होता; ज्याने सगळ्यांचं लक्ष वेधून घेतलं. लवकरच आई होणाऱ्या कियाराने या लूकवर जास्त ज्वेलरी परिधान केली नव्हती. कारण तिचे कानातले आणि अंगठ्यांनी संपूर्ण लूक एकदम सुंदर बनवला होता. तसंच मोकळे कुरळे केस आणि न्यूड मेकअपने कियाराचं सौंदर्य आणखीन खुललं होतं. कियाराने ‘मेट गाला’मधील लूकचे काही फोटो इन्स्टाग्रामवर शेअर केले आहेत. हे फोटो शेअर करत कियाराने कॅप्शनमध्ये लिहिलं, “मे महिन्यातील आईचा पहिला सोमवार.” फोटोंमध्ये कियारा बेबी बंप फ्लॉन्ट करत पोज देताना दिसत आहे. दरम्यान, ‘मेट गाला’च्या ( Met Gala 2025 ) रेड कार्पेटवर कियारा अडवाणीचा जलवा पाहायला मिळाला असला तरी यावेळी तिच्याबरोबर पती सिद्धार्थ मल्होत्राही होता. ( फोटो सौजन्य - कियारा अडवाणी इन्स्टाग्राम )